Estudante sira hosi Eskola 10 Dezembru, Comoro, ba aprezenta iha primeiru interrogatóriu iha Tribunal, foin lalais ne'e. Imajen/Eugénio Pereira

DILI, 02 marsu 2020 (TATOLI)–Komandante Polísia Nasionál Timor-Leste (PNTL)  Munisípiu Dili, Superintendente Xefe Armando Monteiro, apela ba juventude hotu atu hakribi ona violénsia  hodi kria pás no estabilidade iha rai-laran.

Notísia Relevante : Konfrontu Hera, Motór Rua ho Mini Ofisina Ida Hetan Estragu

Armando Monteiro hato’o lia hirak-ne’e, ohin, relasiona ho aktu konfrontu sira ne’ebé envolve juventude, foin lalais ne’e,  área Hera, Comoro no fatin seluk tan iha Dili laran.

“Apela nafatin. Maibé, la’ós responsabilidade PNTL nian mesak. Inan-aman no sosiedade hotu atu oinsá tatoli ba oan sira soe ona aktu violentu,” hateten Superintendente Xefe Armando Monteiro, ba jornalista sira iha Komandu PNTL Munisípiu Dili.

Nia husu ba órgaun komunikasaun sosiál atu ejerse mós nia papél “Jornalizmu Dame” hodi haklaken lia-loos no pás hodi evita soran grupu juventude.

Nia afirma, mezmu akontese konfrontasaun ki’ik entre joven sira, polísia halo nia atuasaun hodi hakalma situasaun hodi prosesa autór sira tuir lei no polísia kontinua asegura situasaun seguransa ho trankuilidade ba ema hotu atubele hala’o nia atividade ho hakmatek no seguru.

Notísia Relevante : PNTL Detein Estudante Eskola 10 Dezembru Na’in 22

Superintendente Xefe Armando Monteiro informa, iha domingu  kalan (01/02/2020), mosu konfrontu iha área Metinaro entre joven sira tanba de’it juventude balun nia loko-an (egoízmu) no lakohi lakon ba malu.

”Ho konfrontasaun, horikalan, rezulta joven balun kanek kamaan no polísia kaptura suspeitu na’in-neen (6) ne’ebé agora detein hela no nia prosesu investigasaun la’o hela,” hateten Armando Monteiro.

Jornalista : Nelson de Sousa

Editór       : Francisco Simões

1 KOMENTÁRIU

  1. Iha nasaun seluk, problema violensia nian liga liu ho grupu fundamentalista relijiaun nian sira, iha Timor kazu violensia nian ne’ebe, dala barak liu foi-sa’e sira maka komete, mosu tanba membru grupu arte marsial balu nian sai radikal, no ho egoizmu lakoi atu konsidera no respeita ema ka grupu seluk sira. Bainhira ida-ne’e maka sei iha, keta mehi atu violensia iha Timor-Leste ne’e bele lakon.

HAKEREK NO HATÁN

Please enter your comment!
Please enter your name here