Parlamentu Nasionál hasa’e bandeira meia aste ba Deputadu Gilman Exposto dos Santos ninia mate, iha segunda (25/11). Imajen/Evaristo Soares Martins

DILI, 02 marsu 2020 (TATOLI)—Reprezentante povu iha Uma-fukun Parlamentu Nasionál (PN), kondena maka’as ema deskoñesidu ne’ebé baku veteranu Reis Kadalak.

Deputadu Bankada FRETILIN, Alexandrino de Araújo, dehan ema hotu tenke respeita veterani sira tanba sira mak ai-rin ba Estadu ida-ne’e.

“Aban ita komemora loron nasionál veteranu, maibé ohin veteranu Reis Kadalak, ne’ebé hetan tuda ka baku hosi grupu deskoñesidu balun, ita bele prega ema sira-ne’e baku ne’e hanesan ema sira ne’ebé uluk lakohi ukun-an,” dehan Deputadu Alexandrino de Araújo liuhosi plenária Parlamentár, ohin.

Nia dehan, veteranu sira mak terus ba funu naruk ida-ne’e no ohin loron ema hotu goza independénsia.

“Ha’u husu ba parte seguransa, liuliu polísia atu buka lalais oknum sira-ne’e. Presiza sansaun forte no todan ba oknum ne’ebé baku veteranu ne’e,” nia dehan.

Entretantu, Deputada FRETILIN, Helena Martins hateten, aktu hosi ema deskoñesidu baku veteranu Reis Kadalak labele tolera no polísia tenke sériu investiga kazu ne’e.

“Ne’e hatudu katak hahú ona ema la respeita veteranu sira. Veteranu tinan 24 de’it sira la rekoñese ona. Tanba ne’e, husu polísia investiga kazu ne’e hodi deskobre autór,” nia hateten.

Notísia Relevante: Kazu Reis Kadalak, La Iha Relasaun ho Veteranu

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here