Arguidu sira ba kazu konfrontu Hera. Imajen/GMN

DILI, 02 marsu 2020 (TATOLI) -Liuhosi audiénsia primeira interrogatóriu, segunda (02/03/2020), Tribunál Distritál Dili (TDD), aplika medida aprezentasaun periódiku ba arguidu na’in neen (6) ne’ebé deskonfia envolve iha kazu konfrontasaun entre grupu juventude ho grupu arte marsiál, foin lalais ne’e, iha area Hera.

Notísia Relevante : Konfrontu Hera, Motór Rua ho Mini Ofisina Ida Hetan Estragu

Arguido na’in neen ne’e ho inisiál TFG, FDS, ADS, CSP, MVN ho MM komete krime danu no violénsia  ne’ebé previstu iha kódigu artigu 260 inséndiu iha artigu 263 iha prosesu penal Timor-Leste.

Tribunal Distritál Dili (TDD) liuhosi Juiz singular Sribuana da Costa, aplika medida aprezentasaun periódika tanba faktu ne’ebé arrola hosi Ministériu Públiku liuhosi Prokuradóra Ivonia Guterres ladún forte.

Defeza Henrique Maris ne’ebé fó asisténsia legal ba arguidu sira informa, ninia kliente sira laiha ema ida partisipa direita iha konfrontasaun refere, tanba momentu ne’ebá sira rasik akompaña lori família nia mate isin ba iha Uatulari, Viqueque, maibé bainhira sira husik mate isin iha rotunda Hera nian, atu fila-fali mai  Dili mak sira hetan konfrontasaun entre grupu rua iha area Mota Ki’ik Hera nian.

Haree ba akontesimentu ne’e, Defensor Henrique Maris, tenik, nia kliente sira deside rekua  hodi hein polísia normaliza tiha situasaun hodi kontinua fila. Maibé to’o iha fatin akontesimentu konfrontu iha ema balun indika sira katak involve iha konfrontasaun refere, maibé realidade asistidu sira ne’e la partisipa tanba momentu ne’ebá sira akompaña mate isin, ho nune’e sira koopera ho polisia hodi entrega-an.

Akontesimentu ne’e rezulta motór rua ho mini ofisina ida hetan estragu totál. Entretantu, audiénsia julgamentu ne’e prezide hosi juis singular Sribuana da Costa, Ministériu Públiku reprezenta hosi Prokuradóra Ivonia Guterres no arguidu sira hetan asisténsia legal hosi Defensór Públiku Henrique Maris.

Jornalista : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here