Vise-Prezidente CCI-TL ne’ebé trata Asuntu Infraestrutura, João Fernandes Alves. Imajen Tatoli/Egas Cristovão

DILI, 02 Marsu 2020 (TATOLI) – Vise- Prezidente Kámara Komérsiu no Industria Timor-Leste (CCI-TL,sigla portugés) ne’ebé trata ba asuntu Infraestrutura, João Fernandes Alves, observa durante tinan-tolu nian laran Timor-Leste la’o iha interteza polítika nia laran hodi halo ekonomia rai-laran hetan inflasaun (sasan folin sae).

“Ekonomia iha inflasaun menus porsentu 1,8, bazeia ba ami nian aprezentasaun ba Prezidente Repúblika iha fulan hirak liubá, tanba osan moeda ne’e la sirkula iha nasaun maibé sai ba li’ur maka barak liu”, tenik João Fernandes ba Agência TATOLI,  iha Akait, segunda ne’e.

Tuir Vise-Prezidente CCI-TL, maski ekonomia Timor-Leste kona inflasaun maibé atividade ekononomia rai-laran kontinua la’o nafatin.

“Atividade ekonómiku tenke la’o nafatin tanba ekonomia ne’e la’ós dehan katak, meski ita sofre inflasaun ona ekonomia tenke paradu. Entaun nasaun bele monu iha krize ekonómiku ida boot liu, maibé halo nusa mós ita ninia ekonomia tenke la’o ba oin”, subliña João Fernandes.

Nia dehan, maski Orsamentu Jerál Estadu la pasa, maibé ladún fó impaktu tanba iha kapitál dezenvolvimentu maka laiha inklui kapitál menór maibé saláriu no vensimentu iha nafatin.

“Ita nian funsionáriu sira iha saláriu, inklui instituisaun Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL), maski ita haree sirkulasaun menus tanba kapitál dezenvolvimentu no kapitál menór laiha, halo kapasidade kompra menus tanba osan ba verba rua ne’e laiha. Ita labele husik ita nian ekonomia nasaun monu, maibé tenke dudu nafatin atu ekonomia rai-laran labele paradu”, nia akresenta.

João Fernandes dehan tan, timoroan sira maski iha situasaun polítika inserteza nia laran, maibé idaidak tenki jere osan oituan ne’ebé maka iha hanesan saláriu, hodi uza no mantein nafatin sirkulasaun ekonomia bele la’o nafatin maski ho inflasaun.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here