Diretór Administrasaun Finansa no Logistika HNGV Duarte Marcal Araujo. Imajen/Egas Cristovão

DILI, 02 marsu 2020 (TATOLI)–Diretór Administrasaun Finansa Lojístika, Ospitál Nasionál Guído Valadares (HNGV-sigla portugés) Dili, daudaun ne’e laiha ona espasu liuliu kama atu akumula pasiente foun sira hodi baixa.

Nia relata ospitál Nasionál kada loron simu pasiente hosi ospitál referál lima no Dili rasik hodi baixa hamutuk 180-resin.

”Entaun husi 180 ba leten ne’e tenke baixa, ita haree ospitál ne’e ninia indikadór ne’ebé ita tau kama ne’e loloos 275 maibé ami tau liu ba 347 hanesan ne’e maibé kontinua la to’o nafatin,” informa Diretór Administrasaun no lojístika HNGV, Duarte de Araújo ba jornalista sira iha ninia servisu fatin ohin.

Tuir nia, kazu ne’e akontese tanba pasiente balun hosi Dili tuir loloos halo tratamentu saúde iha sentru saúde sira maibé tenke ba halo tratamentu hotu iha HNGV.

”Loloos ita-nia populasaun iha Dili laran ne’e moras baibain ba sentru saúde sira de’it hodi halo tratamentu ezemplu ba iha Sentru Saúde Comoro no mós ba iha Sentru Saúde Vera Cruz. Se moras todan mak halo rekizitu bele transfere mai HNGV,” nia informa.

Tanba ne’e, diretór ne’e husu ba populasaun iha Kapitál Dili atu halo tratamentu saúde iha sentru saúde sira ne’ebé besik bainhira sente la moras grave.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here