Imajen Tatoli/António Gonçalves

DILI, 02 marsu 2020 (TATOLI)—Tanba mundu ohin-loron preokupadu ba moras coronavirus mak Bankada Parlamentár Frente Revolusionária Timor-Leste Independente (FRETILIN) sujere ba Governu Timor-Leste atu kansela jogu Comunidade Países da Língua Portuguesa (CPLP) ne’ebé atu hala’o iha Timor-Leste.

Liuhusi plenária Parlamentar, Deputada Bankada Parlamentar FRETILIN, Lídia Norberta, sujere ba Governu atu adia tanba situasaun polítika atuál no moras coronavirus ne’ebé halo mundu tomak preokupadu.

“Tinan ida-ne’e ita sai uma-na’in ba jogu CPLP. Ami preokupada ho situasaun. Ita atu apoia jogu CPLP ne’e, agora buat ida coronavirus sai preokupante iha nasaun hotu-hotu. Haree ba kondisaun iha Timor ne’ebé mak iha, ami atu sujere se bele ita kansela tiha jogu CPLP ne’e. Tanba ne’e, ami sujere kansela tanba haree ba ita-nia kondisaun ne’ebé mak iha, karik opurtunu ba tinan oin mai ita bele apoia filafali,” Deputada Bankada Parlamentár FRETILIN, Lídia Norberta, sujere liuhosi plenária Parlamentar iha Parlamentu Nasionál, segunda ne’e.

Deputada Bankada Opozisaun ne’e konsidera atividade jogu CPLP la’ós ikus mak tinan ida-ne’e tanba iha tinan seluk mós jogu ne’e sei iha. Tanba, nia dehan, oras ne’e mundu tomak preokupa ho coronavirus.

Hatán ba sujestaun ne’e, Ministru Reforma Lejizlativa no Asuntu Parlamentár (MRLAP), Fidelis Magalhães esplika, Governu sei foti desizaun hafoin informa fali ba reprezentante povu sira iha Uma-fukun Parlamentu Nasionál.

“Kona-ba sujestaun kanselamentu ba atividade jogu CPLP ami sei hato’o tanba até Sekretáriu Jerál ONU (Organizasaun Nasaun Unida) rekomenda katak enkontru simeira sira bele kansela hotu,” nia katak.

Nia dehan, Sekretáriu Jerál ONU, António Guterres rekomenda ba ajénsia ONU no organizasaun rejionál sira-nian atu kansela hotu reuniaun internasionál sira tanba moras coronavirus ne’e.

“Jogu olímpiku mós kansela. Ne’ebé, ha’u hanoin se ita kansela karik, ne’e la’ós úniku ita mak halo ida-ne’e. Organizasaun Mundiál Saúde mós husu ba nasaun sira iha mundu tomak laiha nasaun ida mak forte hodi kontra coronavirus. Ne’ebé, keta hanoin dehan ita iha biru (kakaluk) kontra coronavirus. Tanba ne’e, tenke antesipa buat hotu atu labele ema mate tanba moras ida-ne’e,” nia esplika.

Notísia Relevante: KM Autoriza Utilizasaun Orsamentu $511.250 ba Preparasaun Jogu CPLP

Jornalista : Evaristo Soares Martins

Editór      : Cancio Ximenes