Diretór Jerál Bee no Saneamentu, Gustavo da Cruz. Imajen/Florencio Miranda Ximenes.

DILI, 02 marsu 2020 (TATOLI)Ministériu Obra Públika (MOP) liuhosi Diresaun Jerál Água no Saneamentu (DGAS-sigla portugés), hahú janeiru to’o fevereiru 2020, konsege monta ona kontadór bee iha kapitál Dili.

“Ami instala ona kantadór bee hamutuk 4.000 ba uma-kain sira iha kapitál Dili”, tenik Diretór Jerál DGAS, Gustavo da Cruz, iha salaun Delta Nova, Comoro, segunda ne’e.

Nia realsa, DGAG-MOP kria ona ekipa ho membru 10 hodi kontinua halo servisu monitoriza no kontrola konsumidór sira ne’ebé mak utiliza metru kontadór atu selu, inklui halo kontrola ba sira ne’ebé dada bee ilegál.

“Dadaun ami loke hela balkaun tolu iha Kuluhun, Caicoli no Comoro, atu konsumedór sira bele ba selu. Tanba ne’e, ha’u hanoin ho esforsu ne’ebé  ita halo, edpera bele kombate koneksaun ilegál sira kona-ba ema ne’ebé estraga bee ka konsumidór ne’ebé uza bee la tuir padraun ne’ebé iha”, nia akresenta.

Maski nune’e, Diretór Gustavu da Cruz rekoñese sei iha komunidade lubuk ida mak seidauk iha kontadór tanba estoke hotu ona no sei planu atu aumenta.

Nia dehan, DGAS durante ne’e iha limitasaun pesoál atu kontrola tomak ba abastesimentu bee ka sistema bee moos iha kapitál Dili.

“Ami husu atu konsumidór, komunidade no autoridade komunitáriu sira ne’ebé hetan kanu tohar ka bee sai, halo favór mai fó hatene ami liuhusi website, facebook ka mai kedan iha ami nia edifísiu atu ami nia tékniku sira bele ba hadi’a”, nia salienta.

Dirijente ne’e husu ba komunidade iha kapitál Dili labele tesi ka halo kuak kanu bee tanba bele fó risku ba komunidade balun la asesu bee moos.

“Sansaun ha’u sei la aplika ba konsumidór, maibé ba ha’u nia funsionáriu ne’ebé nakar no kontribui halo konetivadade bee moos ho ilegál. Sira (funsionáriu) balun ha’u prosesa ona to’o Komisaun Antí-Korrupsaun (KAK) atu halo investigasuan. Ha’u haruka ba investiga iha KAK tanba ita hakarak hadi’a instituisaun, ita labele halimar ho insituisaun, no ita labele halimar ho konfiansa povu nia atu halo atendimentu públiku”, nia dehan.

Nune’e, DGAS kontinua halo esforsu atu mellora kanalizasaun bee hodi abitante hotu bele asesu tanba sistema bee komplikadu iha terrenu, tanba ne’e tenke rezolve pur faze.

Konsumidór dada bee ilegál, tuir Diretór ne’e iha barak maibé haruka sira kontribui hodi aumenta reseita.

“Kuaze iha ilegál lubuk ida, maibé ami tenta legaliza ligasaun sira ne’e atu rejistu hodi kontribui reseita Estadu nian”, nia akresenta.

Tuir Dekretu-Lei númeru 3/2004 no Diploma Ministeriál 1/2004 katak konsumidór ne’ebé dada bee ilegál sei aplika multa $50 ate $1.000, enkuantu abitante atu halo ligasaun foun bee ba uma-kain selu $55.

DGAS durante ne’e rekolla ona reseita iha janeiru to’o dezembru 2019 hamutuk $120.000 hodi hatama ba kofre Estadu no konsege instala kontadór 3.000-resin.

Jornalista: Florencio Miranda Ximenes

Editora: Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here