Diretór Jerál Colégio Maliana Pe. Norberto Soares/Imajen Espesiál

DILI, 02 marsu 2020 (TATOLI)–Colégio Infante de Sagres Maliana presiza urjente fasilidade eskola nian atu responde ba estudante sira-nia nesesidade, liuliu estudante feto sira ne’ebé sai vítima ba ahi han Lar femeninu, foin lalais ne’e.

Diretór Jerál Colégio Maliana, Pe. Norberto Soares liuhusi telefone informa, sasán sira ne’ebé presiza urjente mak hanesan roupa no farda ba estudante sira, kadernu, livru, lapis, lapijeira, kama andar 50, armáriu 50, kulsaun 93, sumasu 93, kolsa no manta 93, teilla ka azuleizu 220 m3, simentu, fatuk, rai-henek, bloku, rede no poste ba lutu.

“Se ami bele husu, atu tulun sira ne’ebé ita-boot sira hakarak fó, bele koordena uluk lai ho ami, nune’e ita bele halo jestaun di’ak liu ba dezastre ida-ne’e. Ekipa Ad Hoc no Dioseze Maliana sei buka meiu hotu atubele ultrapasa situasaun ida-ne’e,” Pe. Norberto subliña.

Nia informa, iha 28 fevereiru 2020, ekipa formadora halo ona oráriu no programa ba estudante sira hahú hosi dadeer to’o kalan hodi halo formasaun no konversa ba traumátika healing no hala’o atividade desportiva.

“Aleinde oráriu rutina hanesan hadeer, reza-misa, han no toba, iha mós atividade sira hanesan formasaun no konversa ba traumátika healing, atividade desportiva hanesan Yoga no mós vollyball, atividade rekreativa hanesan asiste filme hamutuk iha kalan molok atu toba,” nia infroma.

Notísia Relevante: MEJD Koordena ho Ministériu Relevante Hodi Ajuda Estudante iha Colégio Maliana

Tuir planu, nia haktuir, estudante sira sei hela durante semana ida iha Betania Training Center hodi partisipa iha programa reabilitasaun hosi trauma.

Daudaun ne’e, tuir nia, atividade hanorin no aprende iha Ensinu Báziku Sentrál no Eskola Sekundáriu Jerál, Colégio Infante de Sagres Maliana suspende durante semana ida.

“Hein katak, ho Maromak nia tulun, estudante sira hotu ne’ebé oras ne’e hela iha BTC bele fila bá lar iha sesta, 6 marsu 2020. Atividade eskolár formál sei bele hahú hikas iha loron segunda, 9 marsu 2020,” diretór jerál ne’e esplika.

Oras ne’e daudaun, nia hatutan, ekipa serbisu hela atu prepara kondisaun bázika atu atividade internatu no prosesu aprendizajen nian bele la’o normál fali. Serbisu ne’ebé halo maka modifika sala aula 3 Ensinu Báziku Sentrál nian ba fali dormitóriu.

“Sei tau azuleizu ba sala sira, hadi’a pláfon, loke odamatan ba haris fatin, prepara kondisaun ba iha haris fatin. Ekipa mós koordena ona ho karpintária sira atubele halo kama no armáriu ba estudante sira. Koordena ona ho ajénsia no pesoál balun atubele suporta kolsa, lensól no manta ba estudante sira,” nia salienta.

Ba tulun hirak-ne’e, Pe. Norberto mós agradese ba parte hotu ne’ebé fó ona apoiu ba estudante sira iha Colégio hafoin hetan dezastre ahi han koléjiu refere.

“Agradese ba Maromak ba di’ak tomak ne’ebé ami simu. Ami simu domin, solidariedade no apoiu tomak atubele ultrapasa situasaun ida-ne’e. Ami hatene katak ema barak mak hadomi ami, ne’ebé hatudu liuhosi orasaun, liafuan korajen, osan no sasán,” nia dehan.

To’o agora daudaun, nia infroma, ema barak mak fó ona tulun barak tebes no rejista hodi sei fó-sai iha tempu tuir mai. Nia mós hatene katak ema barak no grupu barak mós mak oras ne’e daudaun organiza hela atu halibur osan no sasán atu fó apoiu ba estudante sira.

“La’ós osan ka sasán maibé liuliu ba domin no solidariedade ne’ebé hatudu hosi orasaun, liafuan korajen, osan no sasán sira. Ba ida-ne’e, ami promete atu reza, Maromak mak sei rekompensa,” dirijente másimu ne’e hato’o agradesimentu.

Notísia Relevante: Ekipa “Ad Hoc” Ba Ahi Han Colégio Maliana Hahú Hala’o Knaar

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here