DILI, 02 marsu 2020, (TATOLI)–Komisaun Nasionál ba Eleisaun (CNE-sigla portugés) hetan konvite hosi Primeiru-Ministru (PM), Taur Matan Ruak hodi atualiza servisu komisaun nian durante ne’e.
“Primeiru-Ministru konvida ami mai atu atualiza kona-ba CNE servisu ne’ebé durante ne’e la’o. CNE efetua ninia atividade dezde eleisaun 2018, haree ba kotuk mós atividade la’o no iha 2018 iha eleisaun tolu ne’ebé CNE konklui no la’o ho di’ak to’o agora”, informa Prezidente CNE, Alcino de Araújo Barris hafoin hasoru-malu ho Primeiru-Ministru (PM), Taur Matan Ruak iha Palásiu Governu, Dili, segunda ne’e.
Nia haktuir, iha enkontru ne’e CNE aprezenta mós preokupasaun balun relasiona ho atu revee filafali lakuna ne’ebé hanesan pontu frakeza durante halo aktu eleitorál, nune’e bele hadi’a ho maneira formasaun ne’ebé di’ak liu ba CNE.
Alcino dehan, iha mós parseiru ho Partidu Polítiku (Parpol) ne’ebé fó mós formasaun no halo enkontru rutina atu haree ba aktu eleitorál, lei sira ne’ebé regulariza ba prosesu hotu entre Parpol ho CNE no órgaun eleitorál hanesan Sekretariadu Téknika Administrasaun Eleitorál (STAE).
“Ami mós informa ba Primeiru-Ministru kona-ba peskiza ne’ebé mak CNE foin konklui iha territóriu laran tomak no tempu badak rezultadu sei fó sai ba públiku. Aleinde ida-ne’e, informa mós preparasaun ba realizasaun edukasuan sívika. Ami-nia peskiza kona-ba aktu eleitorál iha tinan sira liubá haree fali atendimentu órgaun administrasaun eleitorál nia progresu. Ezemplu, iha eleisaun barak la vota ne’e tanbasá? Haree mós tanbasá maka sira tuu sala hela de’it, tanbasá maka buletin votu husik mamuk de’it? Buat sira-ne’e ami tenta haree filafali”, nia akresenta.
Biban ne’e, CNE relata mós ba PM Taur katak CNE prepara ona proposta ida hodi kria sentru formasaun ba edukasaun sívika iha área oin-oin.
“Razaun kria sentru formasaun ne’e tanba Timor-Leste iha ona títulu Repúblika Demokrátika ne’ebé koñesidu tebes iha mundu, tanba ne’e atu garante demokrasia ne’e ho kualidade, bá-oin labele liu de’it husi edukasaun sívika maibé tenke kria mós sentru ida atubele fó prepasaun di’ak liubá komunidade”, nia akresenta.
Jornalista: Antónia Gusmão
Editora: Julia Chatarina
