Governadór BCTL, Abraão de Vasconcelos. Imajen Tatoli/Egas Cristovão

DILI, 02 marsu 2020 (TATOLI) – Banku Sentrál Timor-Leste (BCTL-sigla portugés), daudaun ne’e seidauk simu informasaun ofisiál kona-ba sirkulasaun osan falsu iha Timor-Leste.

Governadór BCTL, Abrãao de Vasconselos, hateten daudaun ne’e Banku Sentrál seidauk simu informasaun formál husi parte ida relasiona ho vídio ne’ebé espalla iha mídia sosiál no sai virál, maibé bazeia ba informasaun hirak-ne’e maka parte BCTL konvoka ona soru-mutuk formál ida hodi tau-atensaun ba asuntu ne’e.

“Ami iha BCTL asesu informasaun hanesan públiku sira haree liuhosi mídia sosiál, maibé ami realiza ona enkontru entre área parte relavante iha Banku Sentrál hodi trata ba asuntu sira hanesan ne’e. BCTL seidauk simu informasaun ofisiál ne’ebé bele konfirma katak sasán hanesan ne’e iha ka lae?”, dehan Governadór ba Agência Tatoli iha Edifísiu BCTL, Akait, Dili, segunda ne’e.

Maski nune’e, Abrãao dehan BCTL iha ona autoridade atu trata asuntu sira-ne’e.

“Ha’u husu enkontru ho Diretora Ezekutiva Unidade Informasaun Finanseira (UIF) hodi haree oinsá UIF bele kontribui iha prosesu ida-ne’e, nune’e fó tulun ba Ministériu Públiku, Polísia Sientífika Investigasaun Kriminál (PCIC-sigla portugés) no Polísia Nasionál Timor-Leste (PNTL), karik sira presiza UIF nia tulun. Banku Sentrál konserteza hanesan autoridade supervizór no reguladora ba instituisaun finanseira Timor-Leste ne’ebé disponível atu fó apoiu ba instituisaun sira ne’ebé toma konta ba asuntu sira hanesan ne’e”, nia subliña.

Responsável másima BCTL ne’e afirma tan, Banku Sentrál iha fasilidade hodi deteta osan falsu, tanba iha Timór, banku ne’e maka iha infraestrutura di’ak liu atu deteta osan falsu.

“BCTL iha unidade espesiálida kona-ba atu deteta osan falsu inklui regra espesífiku, maibé ida-ne’e hanesan infraestrutura de’it. Saida maka Banku Sentrál hakarak foku maka oinsá atu kompartilla informasaun ba públiku no eduka públiku katak simu osan falsu imediatamente hateten kedas katak osan ne’e falsu no ami iha esperiénsia durante ne’e, iha interasaun ne’ebé Banku Sentrál halo ho komunidade ne’ebé indika barak mak hatene oinsá haree osan falsu ka lae”, nia salienta.

Abrãao fó hanoin mós katak, iha 2003 no 2004 autoridade seguransa halo ona apreensaun ba osan falsu.

“Iha Dekretu-Lei númeru 20/2003 kona-ba moeda ofisál, iha baze legál ne’e hatúr obrigasaun karik instituisaun bankária, hanesan instituisaun finanseira sira iha Timor-Leste deteta iha osan falsu, obrigatoriamente tenke informa mai Banku Sentrál no tenke rejista kona-ba osan falsu ne’e”, nia salienta.

Jornalista: Antónia Gusmão

Editora: Julia Chatarina 

HAKEREK NO HATÁN

Please enter your comment!
Please enter your name here