Governdor BCTL, Abrãao Vasconselos ho Ministra Edukasaun, Juventude no Desportu, Dulce de Jesus Soares hatudu hela dokumentu ne'ebé asina hosi BCTL no MEJD kona-ba implementasaun programa Literasia Finanseira iha Eskola sira, seremonia ne'e hala'o iha salaun enkontru BCTL, Akait, Dili, Segunda (02/03/2020). Imagén TATOLI/Antónia Gusmão.

DILI, 02 marsu 2020 (TATOLI)–Banku Sentrál Timor-Leste (BCTL-sigla portugés) no Ministériu Edukasaun, Juventude no Desportu (MEJD), renova akordu kona-ba implementasaun Literasia Finanseira iha Eskola Ensinu Báziku sira iha Timor-Leste.

Akordu ne’e asina husi Governadór BCTL, Abrãao de Vasconcelos no Ministra Edukasaun, Juventude no Desportu, Dulce de Jesus Soares iha salaun enkontru BCTL, Akait, Dili, segunda ne’e.

“Iha juñu 2016, Banku Sentrál no Ministériu Edukasaun asina akordu ida atu implementa programa pilotu kona-ba Literasia Finanseira, ne’ebé durante tinan-haat hala’o ona iha munisípiu hotu inklui iha Rejiaun Administrativa Espesiál Oé-Cusse Ambeno (RAEOA) no foku de’it ba iha Eskola Ensinu Báziku, ne’ebé durante períodu ida-ne’e, ekipa hosi Banku Sentrál no Ministériu Edukasaun estende programa ne’e ba eskola hamutuk 334”, dehan Governadór BCTL hafoin asina akordu.

Abrãao hatutan, durante ne’e implementasaun hosi programa pilotu ne’e iha ona progresu ne’ebé di’ak no tanba parte rua haree iha nesesidade maka hakarak estende liután no sei tau iha programa kuríkulu ida.

“Hakarak atu estabelese di’ak liután kooperasaun ne’e, liuliu iha prosesu implementasaun maka estabelese akordu ida. Akordu ne’e la’ós de’it ba tinan-haat maibé sei kontinua nafatin tanba hosi parte Governu nian konsidera hanesan kompromisu ministériu nian atu garante katak labarik sira bele asesu ba informasaun ne’ebé maka di’ak kona-ba Literasia Finanseiru”, subliña Abrãao.

Responsável másima BCTL ne’e dehan tan, durante implementa programa pilotu ne’e iha porsentu 14 ka estudante 35.0000 resin maka partisipa, enkuantu husi porsentu 14 ne’e ho situasaun jeográfiku hanesan Timor-Leste ninian, konsidera la’ós númeru ne’ebé ki’ik.

Parte seluk, Ministra Edukasaun, Juventude no Desportu, Dulce de Jesus Soares, konsidera programa ne’e sei bele ajuda estudante sira atu sai joven ne’ebé di’ak iha futuru.

“Ami asina nota entendimentu ida atu kontinua mellora implementa programa Literasia Finanseira ne’ebé maka hala’o tiha ona iha 2016. Antes ne’e, hosi programa pilotu ne’e, ninia kobertura la abranje ba estudante hotu, maibé atinje ona porsentu 14 hosi estudante sira ne’ebé partisipa. Tanba ne’e, ami garante katak ho akordu ne’e, ministériu sei servisu maka’as liután no sei kria ekipa konjunta forte entre BCTL no MEJD nune’e bele iha terseiru síklu ensinu báziku tama hanesan parte ida hosi kurríkulu”, nia informa.

Tuir governante ne’e, programa ne’e importante tebes atu komesa eduka estudante sira atu koñese kona-ba Literasia Finanseira.

“Ha’u hakarak hateten katak rai-osan ne’e la sai kostume Timor nian, maibé ita haree ba jerasaun aban bain-rua nian, sira (estudante) tenke sai joven ne’ebé enfrenta futuru ida-ne’ebé mak modernu. Entaun, sira sei iha abilidade ida-ne’e to’o agora no sei ajuda sira-nia vida iha futuru no mós ajuda inan-aman hodi jere ekonomia família nian. Tanba ne’e, fatin di’ak liu fó koñesementu ba matéria sira hanesan ne’e, eskola maka fatin di’ak liu”.

Nune’e, Ministra agradese ba BCTL ne’ebé bele hala’o ona programa ne’e liuliu hili MEJD sai hanesan fatin apropriadu hodi fó koñese Literasia Finanseira.

“MEJD kompromete katak sei implementa programa ne’e ho di’ak”, nia salienta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here