Imajen Espesiál

Só iha nasaun ida de’it mak sai ha’u-nia nasaun. Nasaun ne’e moris no buras tanba ha’u-nia hahalok. No, hahalok ne’e mak ha’u-nia hahalok (Vise-Prezidente Indonézia dahuluk, Mohammad Hatta).

DILI, 1 marsu 2020 (TATOLI)—Maske saudozu Afonso da Costa Rangel ‘Tatamou’ fila hiaks ona ba Aman Lalehan nia uman iha 28 fevereiru 2020 no tuir planu sei haloot iha Jardin dos Herois Metinaro iha loron 5 marsu 2020 semana oin maibé nia naran sei moris ba nafatin.

Saudozu Tatamou ne’ebé moris iha Viqueque iha loron 30 Abril 1943 ne’e hakotu iis iha HNGV, bainhira hela loron lima tan de’it, Governu Timor-Leste atu selebra loron nasionál veteranu iha iha loron 3 Marsu 2020. Karik, nia bele tiha ona, maibé daudaun ne’e nia hamutuk ona ho saudozu sira seluk iha lalehan hodi selebra loron nasionál veterenu ne’e ho laran ksolok.

Biar nia fila ona ba Maroman nia uman maibé ninia “hahalok” sira be nia hatudu bainhira nia envolve-aan iha luta ba libertasaun nasionál sei la mate hori ohin ba nafatin.

Maske nia otas nakaras ona, antes nia mate, hanesan manu-aman, nia sempre hamriik iha ohin hodi luta nafatin ba veteranu sira-nia moris di’ak. Tanba, nia hatene, ninia envolvimentu iha luta ba libertasaun nasionál durante ne’e, hanesan liafuan kmanek ne’ebé Vise-Prezidente Indonézia dahuluk, Mohammad Hatta haktuir;

“Só iha nasaun ida de’it mak sai ha’u-nia nasaun. Nasaun ne’e moris no buras tanba ha’u-nia hahalok. No, hahalok ne’e mak ha’u-nia hahalok.”

Tatamou Envolve-Aan Harii MIPLIN

Saudozu Afonso da Costa Rangel ‘Tatamou’ moris iha Viqueque, 30 abril 1943. Durante tempu rezisténsia, Tatamou asume kargu nu’udar Asistente Komisariadu iha tempu Zona Libertadas sai responsavel prinsipál rede klandestina iha Viqueque.

Iha zona okupadas, hafoin tun mai vila iha 1979, Tatamou mobiliza populasaun iha Viqueque hala’o atividade klandestina no envolve-aan harii Milícia Popular de Libertaçao Nacional (MIPLIN) hodi organiza levantamentu iha Viqueque.

Tanba atividade polítika hirak ne’e, militár Indonézia kaer Tatamou hodi destera ba Autaúro iha 1982-1985. Ho desteru iha Ataúro, la hapara “Tatamou” nia atividade polítika ba ukun rasik-aan. Klandestinamente, Tatamou nafatin luta hodi hala’o ninia atividade polítika.

Ho atividade polítika hirak ne’e mak militár Indonézia sira kaer Tatamou dala ida tan, hodi halo torturasaun no kastigu nia iha Komarka Balide, Dili, Timor-Leste.

Ho orientasaun husi Komandante FALINTIL David Alex ‘Daitula’, Tatamou hamutuk ho eis prizoneiru polítiku sira seluk kontinua hela iha Dili.

Tatamou la fila ba nia rai moris fatin Viqueqeu hodi harii rede klandestina iha Dili ne’ebé hanaran “Orgão Oito” iha 1987 ne’ebé atu halo ligasaun ba Timor laran tomak no ba rai-liur.

Ba Tatamou nia dedikasaun tomak iha luta libertasaun nasionál ida ne’e mak Estadu Timor-Leste fó rerekoñesementu no fó valorizasaun ba asaun koletiva ho envolvimentu Tatamou ninian ba luta libertasaun nasionál hodi kondekora ho grau Medalla Ordem Timor-Leste iha komemorasaun loron Independénsia Timor-Leste iha 28 novembru 2016.

Adeus Saudozu Tatamou!

Notísia Relevante: Veteranu Tatamou Hakotu Iis iha HNGV

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here