Sekretáriu Estadu Kooperativa, Arsenio Pereira da Silva, hamutuk ho membru Movimentu Kamponez Timor-Leste (MOKATIL), iha enseramrntu Asembleia Traballu Nasionál MOKATIL, ne’ebé realiza iha CCD, sábadu (29/02). Imajen/Natalino Costa

DILI, 29 fevereiru 2020 (TATOLI) – Iha diskursu enseramentu Asembleia Jerál Traballu Nasionál Movimentu Kamponez Timor-Leste (MOKATIL) ba da-sia, Sekretáriu Estadu Kooperativa, Arsenio Pereira da Silva, garante katak MOKATIL sei sai parseiru permanente ba Sekretaria Estadu Kooperativa (SEKoop), tanba ne’e nia husu ba kamponez sira kontinua hasa’e produsaun.

“Desizaun sira ne’e sei filafali ba Sekretaria Estadu Kooperativa no sei fó filafali ba MOKATIL hodi fó apoiu ba sira, tanba iha ha’u ninia mandatu nu’udar Sekretáriu Estadu Kooperativa, hakarak koopera ho MOKATIL atu halo produsaun muti-setorál ba saida maka ita prodús”, tenik Arsenio iha Sentru Konvensaun Dili (CCD-sigla portugés), sábadu ne’e.

Notísia Relevante: Asembleia Traballu MOKATIL Konsege Define Presu Sorghum

Iha biban ida ne’e, governante ne’e kongratula MOKATIL ne’ebé ho susesu hala’o Asembleia Traballu Nasionál, ne’ebé konsege define presu ba produtu ne’ebé to’os-na’in sira prodús rasik.

“Ha’u hakarak friza tan, ita bo’ot sira hasai ona rezolusaun ida liuhosi asembleia ne’e no hakotu presu ne’ebé maka justu ba kamponez sira no pela primeira vez iha rai ida-ne’e ita bo’ot sira maka deside rasik folin, parabéns ba imi”, nia subliña.

Arsenio nota, iha tinan barak nia-laran laiha desizaun presu ba produtu rai-laran rasik hanesan iha tempu Indonézia.

“Ema kamponez sira seidauk deside presu ba sira ninia produtu. Dala-barak ema mai husi li’ur maka deside presu. No fim ita ignoradu nafatin, ita kiak nafatin no ita mukit nafatin, maibé ohin kamponez sira hamutuk kombate kestaun ne’e. Tanba ne’e maka ohin ita bo’ot sira deside produsaun ninia presu no ita bo’ot sira maka tenke sai na’in hodi tau nia naran no saida de’it ba produtu ne’ebé maka ita prodús, tanba abosolutamente iha ita bo’ot sira nian liman”, nia afirma.

Nune’e, nia dehan, ba desizaun sira ne’ebé maka MOKATIL deside ona, SEKoop sei ba haree hodi halo aseitasaun.

Jornalista : Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here