Sekretáriu Estadu Kooperativa, Arsenio Pereira da Silva. Imajen TATOLI/Egas Cristovão

DILI, 29 fevereiru 2020 (TATOLI) – Sekretáriu Estadu Kooperativa, Arsenio Pereira da Silva, motiva joven sira ne’ebé atu ramata universidade, atu hatudu kreatividade no inovasaun nune’e bele ajuda inan-aman halo produsaun iha setór agrikultura atubele kontribui ba dezenvolvimentu ekonomia rai-laran.

“Ha’u husu ba inan-aman sira tenke enkoraja oan sira hodi hahú ona prodús saida maka ita iha daudaun. Joven barak agora buka maka sai Funsionáriu Públiku de’it, maibé ha’u hakarak dehan joven sira labele hanoin sai Funsionáriu Públiku maibé bainhira ita hotu iha univesidade, tenki iha hanoin fila ba kampu hodi hahú halo produsaun. Hanesan ha’u dehan, ita mai husi kampus, fila husi ba kampu“, dehan Arsenio ba Agência TATOLI, hafoin ramata Asembleia Traballu Nasionál Movimentu Kamponez Timor-Leste (MOKATIL) ba da-sia, ne’ebé realiza iha Sentru Konvensaun Dili (CCD-sigla portugés), sábadu ne’e.

Governante ne’e observa, Timor-Leste iha rai ne’ebé produtivu barak maibé tanba la utiliza ho didi’ak área produtivu sira maka rai barak abandonadu, tanba ne’e nia parte husu joven sira atubele halo produsaun iha setór agrikultura.

“Ha’u husu ba joven sira agora ita labele hanoin sai funsionáriu maka iha osan, tanba funsionáriu ne’e saláriu mós la sufisiente iha Dili ho nesesidade boot kada-loron ho saláriu funsionáriu de’it la sufiiente. Maibé kuandu ita prodús produtu agrikultura sira, ita bele iha rendimentu ne’ebé maka boot liu”, nia realsa.

Maski nune’e, governante ne’e louva estudante lisensiadu univeridade sira balun ne’ebé komesa book-an iha organizasaun MOKATIL atu ajuda to’os-na’in sira halo produsaun iha rai-laran.

“Foin daudaun ha’u nia vizita ida ba Aileu, hau haree lisensiatura ne’ebé ramata ona sira nian estudu iha univeritáriu no envolve sira nia-an iha movimentu kamponeza. Ida ne’e inisitiva ne’ebé di’ak no ha’u espera katak estudante ka joven tenke banati tuir”, nia haktuir.

Tuir Arsenio, tempu ona joven sira hamutuk ho movimentu kamponeza sira hodi orienta halo produsaun agrikultura atu labele hein de’it produtu husi rai-li’ur.

“Ha’u husu joven sira, tempu ona ita fila ba ita-nia horik fatin atu hahú ajuda maluk agrikultór iha área rurál, atubele hamutuk ho sira halo produsaun iha multi-setorál hanesan hakiak animal, kuda Sorghum no seluk tan, nune’e bele kontribui ba ekonomia rai-laran”, nia salienta.

Nune’e, nia dehan, baihira joven sira halo ona produsaun, Governu iha obrigasaun atu fó apoia morál no materiál, nune’e bele enkoraja di’ak liután joven sira ba insiativa ne’e no bele fó benefísiu ba povu Timor-Leste.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here