Prezidente Komisaun Omenajen, Virgílio Smith. Imajen Tatoli/Egas Cristóvão

DILI, 28 fevereiru 2020 (TATOLI)—Komisaun Organizadora ba selebrasaun loron nasionál veteranu, ohin, konvida Prezidente Parlamentu Nasionál, Arão Noé de Jesus da Costa Amaral, atu prezide hatún bandeira iha loron 3 marsu lorokraik ne’ebé sei  hala’o iha Palásiu-Governu, Dili.

“Ami lori programa aprezenta ba Prezidente Parlamentu Nasionál atu prezide serimónia hatún Bandeira iha 3 de marsu lorokraik. Tanba ne’e mak Prezidente Parlamentu husu ba ami para atu mai breafing hodi bele intera loloos ho ajenda ne’ebé mak atu hala’o iha dia 1 to’o dia 3 de marsu nian ne’e,” Prezidente Komisaun Organizadora no Atuál Prezidente Komisaun Omenájen, Virgílio Smith, informa ba jornalista sira iha Parlamentu Nasionál, ohin.

Prezidente Komisaun Organiza ne’e mós informa, loron 1 marsu ne’e sei hala’o misa iha Jardim dos Herois, Metinaro, iha tuku 09.00 dadeersan.

Iha loron 2 fulan marsu, nia dehan, sei hala’o semináriu ida iha Sentru Konvensaun Dili (CCD-sigla portugés) ne’ebé sei konvida líder nasionál sira sei mai fahe esperiénsia funu nian, no iha loron 3 marsu ne’e sei hasa’e bandeira ne’e fahe ba parte rua mak parte dadeersan no lorokraik.

Entretantu, Prezidente Parlamentu Nasionál, Arão Noé hateten, komisaun organizadora sira mai hato’o konvite ba nia hodi bele partisipa iha selebrasaun loron nasionál veteranu ne’e.

“Komisaun Organizadora konvida ha’u partisipa no hodi prezide hatún Bandeira iha loron 3 marsu parte lokraik nian. Ha’u dehan konvite mai ona ha’u konsidera no kumpri tuir kalendáriu ne’ebé mak iha,” dehan Prezidente Parlamentu Nasionál.

Notísia Relevante: Bandeira Tolu Sei Hasa’e iha Selebrasaun Loron Nasionál Veteranu

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here