Ministra Edukasaun, Juventude no Desportu Dulce de Jesus Soares.Imajen/Antonio Goncalves

DILI, 28 fevereiru 2020 (TATOLI) – Ministra Juventude, Edukasaun no Desportu, Dulce de Jesus Soares, hateten atu halo pagamentu abonu (bonus) ba kargu diresaun no xefia temporáriu dosente iha eskola sekundáriu tékniku vokasionál públiku, presiza pareser legál husi Komisaun Funsaun Públika (KFP) no Ministériu Finansa (MF), ne’ebé presiza mós hetan aprovasaun husi Konsellu Ministru.

Ho hanoin hirak ne’e, iha reuniaun Konsellu Ministru estraordináriu, Ministra Dulce aprezenta Projetu Dekretu Governu atu estabele suplementu remuneratóriu husi ezersísiu temporáriu ba kargu diresaun no xefia bainhira fó  ba dosente sira ne’ebé ezerse funsaun barak iha estabelesimentu ensinu sekundáriu tékniku vokasionál públiku.

“Ohin iha Konsellu Ministru iha duni ajenda ida hosi Ministériu Edukasaun, Juventude no Desportu kona-ba Dekretu Governu suplementu  remuneratóriu ba ezersísiu temporáriu ba dosente iha eskola sekundáriu tékniku vokasionál públiku”, Ministra informa iha Palásiu Governu, sesta ne’e.

Governante ne’e realsa, Maski diploma ne’e hetan apresiasaun hosi membru governu hotu, maibé parte Ministériu Edukasaun, Juvetude no Desportu (MEJD) presiza kompleta tan dokumentu rua iha pareser legál hosi KFP no MF hafoin lori hikas ba reuniaun Konsellu Ministru tuir mai, tanba dekretu ne’e sei iha ninia implikasaun orsamentál iha Orsamentu Jéral Estadu.

Nia subliña, MEJD prevee ona orsamentu atu bele selu diretór eskola tékniku vokasionál sira ne’ebé maka hala’o sira ninia serbisu desde tinan tolu ona maibé seidauk hetan sira ninia abonu ba kargu xefia, tanba ne’e maka hakarak atu rezolve situasaun ne’e atu ema ne’ebé serbisu iha dereitu tuir lei.

“Ami bele rezolve ho orsamentu doudesimál, maibé seidauk bele deside bainhira tanba sei hetan lai pareser legál hosi KFP no MF. Tanba ne’e laiha obzesaun hosi Konsellu Ministru, bainhira ami aprezenta dokumentu rua ne’e ha’u fiar katak hetan aprovasaun no husi ne’e kedan ministériu bele hala’o servisu ne’e ona”, nia akresenta.

Nune’e, nia husu ba kargu diresaun no xefia sira atu hatudu serbisu di’ak nune’e parte ministériu bele aselera prosesu.

“Ha’u hakarak bolu atensaun ho haraik-an ba diretór sira ensinu tékniku vokasionál sira hotu, atu kontinua hala’o serbisu tanba husi ami nia parte sei halo esforsu atu nune’e ita boot sira nia direitu bele hetan”, nia salienta.

Ministra refere kona-ba totál diretór eskola hamutuk 21, tanba ne’e orsamentu sei haree ba períodu serví Estadu durante tinan hira nia laran no tenke haree mós tuir méritu.

“Situasaun ne’e iha desde tinan-2016 to’o agora, tanba ne’e maka VIII Governu hakarak rezolve situasaun ne’e”, nia dehan tan.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here