Ministra Edukasaun, Juventude no Desportu, Dulce de Jesus Soares

DILI, 28 fevereiru 2020 (TATOLI)-Ministra Edukasaun Juventude no Desportu (MEJD), Dulce de Jesus Soares, sesta ohin, halo enkontru ho reprezentante Banku Nasionál Komérsiu Timor-Leste (BNCTL-sigla portugés), Bank Rakyat Indonesia (BRI), Banku Nasionál Ultramarino(BNU) ho Bank Mandiri hodi buka mekanizmu pagamentu ida di’ak liu ba saláriu profesór sira kada fulan.

Governante informa tuir relatóriu hosi responsavel eskola iha Munisípiu 12 inklui Rejiaun Autómu Espesiál Oé-Cuse Ambeno (RAEOA) relata taxa porsentajen hosi profesór 2.000 resin iha Timor-Leste tenke abandona prosesu aprendijazen tanbe tenke bá forma iha Banku hodi simu sira-nia saláriu.

“Ohin dader ha’u halo ona enkontru ho Banku Nasionál Komérsiu Timor Leste, Banku Ultra Marino (BNU), Bank Mandiri, Bank Rakyat Indonesia (BRI) inklui Ministériu Administrasaun Estatál, tanba ami haree taxa abandona eskolá hosi profesores sira ne’e a’as,” dehan Ministra Governante ne’e, ba jornalista sira iha salaun enkontru MEJD Vila-Verde, sesta ohin.

Profesór sira iha direitu atu simu saláriu fulan-fulan, maibé relatóriu hateten kada fulan profesór tenke abandona eskola to’o loron tolu hodi simu saláriu.

tanba ne’e maka ohin, governu halo deskusaun ho reprezentante Banku sira hodi estabelese kooperasaun iha futuru.

“Banku ida-idak fó sira-nia input ho maneiras oioin ho intensaun atu apoiu governu hodi hakmaan  difikuldade ne’ebé iha. Ne’e duni Ministériu sei halo ánaliza ba esplikasaun husi lidér Banku sira  depois mak sei forma fali ekipa tékniku ida hodi hahú servisu ho Banku ne’ebé Ministériu sei deside,”katak Ministra Edukasaun Juventude no Desportu.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here