Imajen/Foti Hosi Google

DILI, 28 fevereiru 2020 (TATOLI) – Liuhosi audiénsia primeira interrogatóriu, sesta (28/02/2020), Tribunál Distritál Dili (TDD) aplika prizaun preventiva ba arguidu ho inisiál IMA tanba komete krime violasaun seksuál ne’ebé previstu iha artigu 172 kódigu penal Timor-Leste.

Tuir depoimentu Ministériu Públiku katak, kazu ne’e akontese iha loron 24 marsu,  tinan ne’e, iha hotel ida iha kapitál Dili. Ho aktu ne’e, MP akuza arguidu ho krime koasaun seksuál ne’ebé previstu iha artigu 171 iha kódigu penal Timor-Leste, maibé Tribunál hala’o fila-fali rekualifikasaun jurídika hodi altera fali ba krime violasaun seksuál.

Advogadu Fernando da Costa ne’ebé fó asisténsia  legal ba arguidu IMA hateten, rajaun TDD aplika prizaun preventiva ba nia kliente tanba iha duni indísiu forte hodi kondena arguidu IMA.

“Ha’u nia kliente iha mezmu tempu ho krime ne’ebé mak nia halo ne’e bele iha kontinuasaun ho krime seluk, ne’ebé mak prienxe rekizitu jerál iha artigu 183 kódigu prosesu penal,” hateten Fernando da Costa.

Ho desizaun ne’e, Fernando hateten, bainhira nia kliente la satisfás iha desizaun Tribunál iha primeiru instánsia hakarak halo rekursu maka nia parte prontu halo rekursu.

Audiénsia julgamentu ne’e prezide hosi juiz singulár Albertina Neves, Ministériu Públiku reprezenta hosi Prokuradór Ivonia Guterres no arguidu hetan asisténsia legal hosi Defensór Públiku Fernando da Costa.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here