DILI, 27 fevereiru 2020 (TATOLI)–Reprezentante relijioza katólika, Me. Guilhermina Marçal hateten, grávida sedu ne’e fó impaktu boot ba ekonómia família no ekonomia nasaun nian.

“Buat ne’ebé ita haree katak importante tebes tanba kazu ne’e la’ós foin akontese. Realidade ne’ebé iha, labarik minoridade sira agora hola mane no hola feto sedu. Ami parte relijiaun Katólika nian mak haree ba moral,” dehan ordaora Me. Guilhermina Marçal iha debate públiku ho tema “Grávida Sedu iha Jovens Adolesente Nia Implikasaun Ba Sósiu-Ekonómiku iha TL” ne’ebé halao iha Salaun INFORDEPE, Balide, Dili, ohin.

Tanba ne’e, nia husu ba inan-aman sira atu kontrola ho oan sira no tenke halo diálogu ho oan-sira loron-loron. Tanba, nia dehan, komunikasaun entre inan-aman no oan sira ne’e tenke kuda no hahú husi uma laran.

“Ita presiza iha kompreensaun no halo kolaborasaun mútua entre inan-aman ho oan-sira, eskola ho inan-aman no sosiedade tomak. Tanba, futuru Timor-Leste depende ba kualidade kooperasaun no formasaun, edukasaun ne’ebé ita fó ba labarik sira,” nia dehan.

Relijioza katólika ne’e hatutan, Timor-Leste agora ne’e daudaun sai hanesan sosiedade ida ne’ebé mak dijitalidade, ne’ebé dalaruma halo labarik sira-nia espiritualidade morál umana ne’e sai fraku tiha.

“Dijitalidade halo labarik sira-nia maturidade, psikolojia no espirituál morál umana sai fraku. Entaun, buat foun ruma ne’ebé haree husi mídia sira ne’e, sira hakarak koko tanba idade krítika. ,iha ne’e nia hakarak dezenvolve nia emosaun psikolojikamente duké haree ba umana morál nian,” nia esplika.

Nia haklalen, daudaun ne’e labarik feto sira ne’ebé mak hetan grávida sedu mak labarik feto sira ho idade 15-19 ho númeru ne’ebé mak boot iha Timor-Leste.

Tanba, nia dehan, tempu agora inan-aman sira okupa ho nia “Mister Mobile” no oan sira mós preokupa ho nia “Mobile” entaun nia impaktu mak falta komunikasaun entre inan-aman ho oan sira.

Madre ne’e apela ba inan-aman sira atu akompaña oan-feto no oan-mane sira ohin loron nian. Inan-aman hotu-hotu tenke iha konsiénsia no responsabilidade atu akompaña sira-nia oan feto no mane sira.

Tanba, nia dehan, aktu grávida sedu ne’e hatudu katak Timor-Leste nia futuru atu lori ba ne’ebé no kontra prinsípiu moral ema ida-nian.

“Ho aktu ida ne’e hatudu katak ita-nia futuru atu lori ba ne’ebé. Integridade, edukasaun mak forma ema sai ema atu moris kaer prinsípiu moral no matenek. Matenek de’it la to’o maibé tenke sabedória no siénsia. Nia ba eskola la’ós transmite de’it siénsia maibé presiza kolaborasaun entre profesór ho inan-aman sira,” nia dehan.

Notísia Relevante: Grávida Sedu Implika Ba Sósiu-Ekonómiku

Jornalista : Osória Marques

Editór      : Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here