Komandu Polisia Munisípiu Dili lori suspeitu na’in 17 hodi submete ba primeiru interrogatóriu iha Tribunál Distritál Dili. Imajen/Eugénio Pereira

DILI, 28 fevereiru 2020 (TATOLI)- Komandu Polisia Nasional Timor-Leste (PNTL) Munisípiu Dili, ohin, aprezenta estudante hosi Eskola Sekundáriu 10 Dezembru, Comoro, Dili, na’in 17  ba Tribunal Distritál Dili (TDD) hodi submete ba primeiru interrogatóriu.

Notísia Relevante : PNTL Detein Estudante Eskola 10 Dezembru Na’in 22

Estudante na’in 17 hosi Eskola Sekundáriu 10 Dezembru ne’e, autoridade seguransa detein bainhira halo asaltu ba estudante Eskola Sekundáriu Finantil iha Rotunda Prezidente Nicolau Lobato, Dili, tersa (25/02/2020).

Iha konfrontu ne’e, suspeitu sira lori pregu sona kanek vítima na’in tolu (3) ne’ebé tenke hetan tratamentu intensivu iha Ospitál Nasional Guido Valadares (HNGV).

Komandante PNTL Munisípiu Dili, Superintendente Xefe Armando Monteiro dehan, suspeitu ne’ebé PNTL kaptura iha konfrontu ne’e na’in 22, maibé liuhosi investigasaun, liberta tiha na’in lima (5) tanba menoridade.

“Ohin, ami a submete ona estudante na’in 17 ne’e ba primeiru interrogatóriu iha Tribunál Dili hodi prosesa,” informa Armando Monteiro, ohin, ba jornalista sira iha Komandu PNTL Munisípiu Dili, Caicoli.

Superintendente Xefe Armando Monteiro apela ba inan-aman sira atu kontrola sira nia oan ba eskola atu labele komete iha krime hodi afeta ba sira nia estudu.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here