Prezidente Partidu CNRT, Kay Rala Xanana Gusmão.

DILI, 27 fevereiru 2020 (TATOLI)-Negosiadór Prinsipál Fronteira Marítima, Kay Rala Xanana Gusmão, konsidera tasi ho ninia rikusoin hotu importante ba povu iha nasaun ida tanba fó mós apoiu ba dezenvolvimentu.

Eis-Primeiru Ministru, Xanana Gusmão hato’o asuntu ne’e iha ninia diskursu  durante semináriu Internasionál Fórum Rejionál ba Organizasaun Sudeste Aziátiku (ARF-sigla inglés), iha edifísiu Ministériu Finansa, Dili, kinta ne’e.

“Tasi importante tebes ba ita-nia sobrevivente. Nia hanesan mahon ba %80 husi buat moris tomak, importante tebes atu ita kombate mudansa klimátika, kuidadu biodiversidade no prodús  hahán, empregu no rekursu enérjia ne’ebé nasaun sira depende tebes ba,” dehan Xanana.

Nia hatutan, governansa tasi ne’ebé di’ak maka tenke tuir lei tanba importante tebes hodi proteje rikusoin iha tasi laran hanesan balada, aihoris no seluk tan.

“Governansa tasi nian ne’ebé di’ak tuir lei tasi nian ne’e importante tebes hodi proteje ita-nia futuru no promove dame no seguransa globál. Ida-ne’e inklui rezolusaun ba disputa marítima sira ne’ebé bele kria tensaun jeopolítika  fahe nasaun sira no iha tempu ne’ebé tuir loloos ita tenke hamrik hamutuk,” dehan lidér karizmátiku ne’e.

Jornalista: Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here