Sekretáriu Estadu Kooperativa, Arsénio Pereira da Silva. Imajen Tatoli/Egas Cristovão

DILI, 27 Fevereiru 2020 (TATOLI)Sekretáriu Estadu Kooperativa, Arsenio Pereira da Silva, informa bazeia ba relatóriu ne’ebé iha, katak kooperativa tolu ne’ebé maka durante ne’e hatudu progresu di’ak no kontribui ona ba dezenvolvimentu ekonomia Timor-Leste nian.

“Bazeia ba dadus Sekretaria Estadu Kooperativa (SEKoop) ne’ebé husi parte ha’u nia diresaun sira relata, iha kooperativa kréditu tolu ne’ebé mak daudaun ne’e hatudu progresu di’ak tebes. Sira maka hanesan kooperativa Enklave Oé-Cusse, ida husi Maliana ne’ebé ho naran kooperativa Lanamonano no seluk kooperativa Badira husi Dili”, dehan Arsenio ba Agência TATOLI, hafoin partisipa iha Asembleia Jerál dahuluk Kooperativa Solidáriu ba Futuru, ne’ebé realiza iha salaun Ministériu Solidaridade Sosiál, Caicoli, kinta ne’e.

Nia refere liután kona-ba kooperativa husi Oé-Cusse, iha ona fundu kréditu to’o miliaun $1-resin, tuir fali koperativu Maliana no Kooperativa Dili ninia fundu besik $1.

“Sira ne’e fó kréditu ona ba sira ninia membru balun ho fundu husi $5.000, $15.000, no balun liu montante ne’e”, haktuir Arsenio Pereira.

Nia dehan, iha relatóriu ne’ebé maka nia simu katak kooperativa iha munisípiu seluk hanesan Baucau, Ermera no Lospalos mos hahú halo ona dezenvolvimentu kooperativa kréditu ho di’ak tebes liuhosi fó kréditu ba sira nia membru sira.

“Kooperativu sira ne’e rasik agora komesa avansa ona hodi hatudu sira-nia kualidade hanesan kooperativu hodi kontribui ba dezenvolvimentu ekonomia iha rai-laran”, nia salienta.

Nia realsa, bazeia ba dadus ne’ebé iha, husi kooperativa ne’ebé maka iha, kooperativa hamutuk-41 maka ativa halo atividade kooperativu kreditu.

“Iha levantamentu dadus ne’ebé ami iha katak kooperativa hamutuk-195, maibé sira seluk ladún produtivu to’o taka no sira ne’ebé produtivu iha atividade kooperativa kréditu hanesan kooperativa multi-setorál, kooperativa agríkola no kooperativa pekuária sira maka hamutuk-41”, nia akresenta.

Governante ne’e informa tan, sira seidauk halo totál persentajen kooperativa ne’ebé kontribui ona iha dezenvolvimentu ekonomia.

“Espera iha tempu badak SEKoop sei halo peskiza ida hodi públika kona-ba persentajen hira ona husi kooperativa maka kontribui ba ekonomia Timor-Leste”, nia dehan tan.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here