Vise-Prezidente Parlamentu Nasionál, Maria Angelina Lopez Sarmento. Foto Tatoli/ Egas Cristóvão

DILI, 27 fevereiru 2020 (TATOLI)—Terseira Vise-Prezidente Partidu Libertasaun Populár (PLP), Maria Angelina Sarmento Lopez hateten, pozisaun no oportunidade la importante ba Partidu Libertasaun Populár (PLP) maibé importante liu mak solusiona impase polítika iha rai-laran.

“Ami-nia prezidente partidu tun hosi Governu no nia fiar katak CNRT sei rezolve buat hotu iha tempu badak. PLP la’ós haree ba pozisaun, la’ós haree ba oportunidade atu ukun maibé ema ne’ebé iha oportunidade bele responde povu nia halerik ba nesesidade loron-loron nian. Ida-ne’e mak ba PLP importante liu,” Maria Angelina ba jornalista sira, iha resintu Parlamentu Nasionál, kinta ne’e.

Relasiona ho Komisaun Jurisdisaun CNRT, Carmelita Monis, ne’ebé hateten Aliansa Maioria Parlamentár sei nakloke ba partidu seluk atu envolve iha koligasaun ida ne’e, nia hatán, ne’e depende ba CNRT nia desizaun polítika no hanoin katak Timor atu bá-oin liuhosi koligasaun partidária ne’e depende ba CNRT hakarak uza modalidade saida de’it.

“Ezemplu, CNRT hakarak uza modalidade Insidénsia Parlamentár, Grande Inkluzaun ka, ne’e depende ba sira-nia konsensu hamutuk. Keta halo distribuisaun pozisaun sira ne’ebé la tama iha koligasaun, bele kria fali injustisa entre koligasaun sira. Ida-ne’e, orsida ita lori malu bá-mai ho situasaun hanesan de’it,” nia dehan.

Tuir nia, Insidénsia Parlamentár no Grande Inkluzaun ne’e buat di’ak ida tanba bele envolve ema teknokrata sira, ema iha méritu no iha kualidade no ema ne’ebé hosi estrutura partidária maibé tenke garante katak sira tenke iha konsensu hamutuk mak sira hola desizaun hamutuk.

Nia afirma, se sira laiha konsensu no depois iha fali dezikilibru distribuisaun pasta bele hamosu nafatin situasaun inserteza no bele hamosu deskontentamentu entre membru koligasaun sira.

“Ami-nia pozisaun seidauk ko’alia. Se iha Insidénsia Parlamentár ka Governu Grande Inkluzaun, individu ida ka rua ne’ebé iha méritu bele ba envolve ka lae. Ami hotu presiza desizaun koletiva ida hodi simu responsabilidade ba desizaun ne’ebé mak ita foti,” nia hateten.

Razaun, nia dehan, ho nune’e individu sira ne’ebé mak bá tanba insidénsia Parlamentár, nia hola desizaun ruma karik labele afeta ba dignidade Partidu Libertasaun Populár nian.

“Ba ami (PLP) kualkér modalidade ami prontu atu koopera. Importante liu mak oinsá mak ita solusiona imediamente inserteza polítika ne’ebé mak ita-nia povu enfrenta,” nia esplika.

Notísia Relevante: PLP Espera CNRT Bele Solusiona Impase Polítika

Jornalista : Evaristo Soares Martins

Editór        : Cancio Ximenes

HAKEREK NO HATÁN

Please enter your comment!
Please enter your name here