Komandante PNTL Munisípiu Dili, Superintendente Xefe Armando Monteiro. Imajen/Eugénio Pereira

DILI, 27 fevereiru 2020 (TATOLI) – Polísia Nasionál Timor-Leste (PNTL) Munisípiu Dili, detein estudante husi Eskola Sekundáriu Públiku 10 Dezembru na’in 22 tanba deskonfia envolve iha konfrontu ho estudante hosi Eskola Sekundáriu Finantil  iha Rotunda Prezidente Nicolau Lobato, tersa (25/02/2020).

Komandante PNTL Munisípiu Dili, Superintendente Xefe Armando Monteiro, klarifika kazu ne’e mosu tanba  “ego estudante” sira nian hakarak “tuku malu iha estrada” no lakohi lakon ba malu. Nune’e, hamosu konflitu no estudante na’in haat hosi Eskola 10 Dezembru lori pregu sona kanek estudante Eskola Finantil nian na’in tolu.

Estudante 10 Dezembru na’in 22 ne’ebé polísia detein ho inisiál ADC, BDC, ZDZ, LDZ, NDC, EP, AS, LDF, ZDS, LS, ZC, ES, ASS, LMP, AXM, ADCS, ZS, DDS, ZP, RZS, RDC ho LXHJO.

Ba jornalista sira iha Komandu PNTL Munisípiu Dili, ohin, Superintendente Xefe Armando Monteiro,  relata iha parte meudia, momentu ne’e kedas, postu polísia ida iha area refere hola intervensaun imediata hodi akalma distúrbiu no konsege detein suspeitu na’in haat.

Nia dehan, iha parte loraik nian, hafoin vijilánsia PNTL Eskuadra Dom Aleixo, ba fatin akontesimentu no fatin sira seluk ne’ebé konsidera movimentu estudante sira hosi eskola rua ne’e, detein tan suspeitu na’in 18.

Vítima na’in tolu hosi estudante Eskola Sekundáriu Finantil ho inisiál AA, ZDC, BBDZ ne’ebé entre sira ne’e balun kanek iha kotuk laran tanba suspeitu sira utiliza pregu hodi sona hosi kotuk.

Hosi suspeitu sira ne’e, PNTL halo ona prosesu investigasaun no detensaun durante oras 72 nia laran, maibé suspeitu na’in  tolu (3) seluk ho inisiál LS, LX, RDC hetan liberta tanba menoridade.

Armando Monteiro apela ba estudante no joven sira atu mantén pás no estabilidade iha rai laran.

Jornalista : Nelson de Sousa

Editór       : Francisco Simões

INFORMASAUN

HAKEREK NO HATÁN

Please enter your comment!
Please enter your name here