Seremónia Asembleia dahuluk Kooperativa Solidáriu ba Futuru. Imajen/Natalino Costa

DILI, 27 fevereiru 2020 (TATOLI)Organizasaun Rezisténsia Sagrada Família (ORSF) ofisialmente estabelese kooperativa ida ho naran Kooperativa Solidáriu ba Futuru, hodi bele kontribui ba setór ekonomia Timor-Leste.

Iha diskursu seremónia Asembleia dahuluk Kooperativa Solidáriu ba Futuru, Koordenadór Gabinete Apoiu Sosiadade Sivíl, Filipe da Costa, hateten ORSF ohin realiza seremónia hodi formaliza liután ezisténsia kooperativa ne’ebé maka harii ho intensaun hakarak kontribui ba ekonómia rai-laran.

Nia konsidera, organiazasaun rezisténsia ne’e hanesan organizasaun ne’ebé fó sira-nian kontribuisaun ba luta libertasaun nasionál no sira  rasik hatudu ona katak liberta ona pátria no povu husi invazaun.

“Ohin sira mai hamutuk iha ne’e halo Asembleia Jerál dahuluk hodi formaliza liután kooperativa ne’ebé maka organizasaun rezisténsia ne’e harii hodi komptribui ba setór ekonómia Timor-Leste”, dehan Filipe da Costa ba Agência TATOLI, iha salaun Ministériu Solidaridade Sosiál no Inkluzaun (MSSI), Caicoli, kinta ne’e.

Nia louva inisiativa ne’ebé maka ORSF rasik halo hodi harii kooperativa.

“Ha’u louva tebes imi-nian inisiativa ne’ebé maka  halo tanba organizasaun ne’e nia ema sira kontinua sólidu nafatin hodi organiza malu la’o hamutuk, la’ós de’it iha funu hodi liberta ita nia rai no povu, maibé sira hakarak hatudu dala-ida tan hodi estabelese kooperativa, nune’e bele liberta povu ekonómikamente”, nia realsa.

Tuir Konstituisaun Repúblika Demokrátika Timor-Leste (RDTL), kooperativa nu’udar pilár importante hodi kontribui ba dezenvolvimentu ekonomia iha Timor-Leste.

“Ha’u husu ba imi, ba oin tenke buka koopera ho parte hotu liuliu Sekretaria Estadu Kooperativa (SEKooP), nune’e bele ajuda lori kooperativa ida ne’e la’o ho di’ak liután no bele benefisia povu iha nasaun ida ne’e”, dehan koordenadór ne’e.

Nune’e, nia husu ba ORSF tenke jere di’ak liután kooperativa ne’ebé estabelese ona hodi labele depende de’it ba osan Governu.

“Ha’u hanoin ema ne’ebé maka jere kooperativa ida ne’e tenke iha hanoin hodi kooperativa bele ba oin ho di’ak liután no labele depende liu ba osan Estadu. Kuandu osan monu, kooperativa mós mate tanba organizasaun tantu kooperativa barak maka hafoin hetan osan husi Governu la kleur mate. Organizasaun Rezisténsia  Sagrada Família labele hanesan ne’e”, nia enkoraja.

Nia refere kona-ba fundu, ORSF hetan apoiu oituan husi Governu liuhosi Gabinete Apoiu Sosiedade Sivíl ho montante $150.000.

Husi orsamentu ne’e, fahe ba kategoria rua hanesan uza ba atividade formasaun no kapasitasaun membru ho orsamentu $60.000 no  ba orsamentu atividade ekonómia hamutuk $90.000.

Iha fatin hanesan, Prezidente Fundasaun Kooperativa Klibur Fila Liman, Abel Ximenes Larisina, konsidera inisiativa ORSF rasik di’ak no bele sai ezemplu ba organizsaun rezisténsia sira seluk, tanba bele organiza malu hodi harii kooperativa ne’ebé bele kontribui ba dezenvolvimentu ekonómia Timor-Leste.

“Ha’u kongratula imi, ba oin tenke koopera ho parte hotu hodi bele dezenvolve kooperativa ne’e ho di’ak liután tanba kooperativa hanesan pilár importante ba nasaun Timor-Leste”, nia akresenta.

Eis Vise-Ministru Edukasaun VI Governu Konstitusionál ne’e dezafia ORSF atu kria unidade transparánsia iha grupu laran, nune’e bele iha sustentabilidade.

Nune’e mós, Fundadór ORSF ne’ebé sai mós inisiadór ba Grupu Kooperativa Solidáriu ba Futuru, Cornélio Gama ‘L7’, hateten nia parte sei ko’alia ho membru ORSF tomak atu lori kooperativa ne’e la’o di’ak liután.

Nia salienta, kooperativa ne’e sira maka harii no daudaun ne’e ninia membru barak ona.

“Ami nia membru agora 8.000 mai husi rezisténsia sira maibé ba oin kooperativa ne’e la taka dalan ba se de’it maka hakarak sai grupu kooperativa ida ne’e”, dehan nia.

Biban hanesan, Sekretáriu Estadu Kooperativa, Arsenio Pereira, informa SEKoop ba futuru sei tulun kooperativa ida ne’e hodi bele dezenvolve di’ak liután.

“Desde kooperativa ne’e harii, ami seidauk apoia buat ruma tantu finanseiru no matéria sira, maibé ami promete ba oin sei apoia kooperativa ne’e atu dezenvolve di’ak liután”, nia salienta.

Nune’e, Governante ne’e felisita kooperativa ne’e tanba ema ne’ebé maka iha kooperativa ne’e rasik mai husi rezisténsia, maibé iha hanoin di’ak hodi hamutuk harii kooperativa hodi kontribui ba dezenvolvimentu ekonomia Timor-Leste.

Asembeleia Kooperativa dahuluk ne’e Hala’o durante loron-rua, ne’ebé loron dahuluk membru sira sei halo diskusaun ba estatutu kooperativa ne’e rasik no iha loron tuir mai, liuhosi votasaun ne’e sei hili estrutura atu lidera Kooperativa Solidáriu ba Futuru.

Jornalista: Natalino Costa

Editora: Julia Chatarina

INFORMASAUN

HAKEREK NO HATÁN

Please enter your comment!
Please enter your name here