DILI, 27 fevereiru 2020 (TATOLI)–Maski daudaun ne’e Governu funsiona mákina Estadu ho orsamentu duodésimu, maibé atu garante eletrisidade lakan iha territóriu, Ministériu Obra Públika (MOP) prevee ona millaun $6 atu halo pagamentu ba empreza fornesedór kombustível ba sentrál elétrika.
Ministru Obra Públika, Salvador Eugenio Soares Dos Reis Pires, informa parte ministériu aprova orsamentu hodi selu ba dívida empreza SACOM Energy no Esperansa Timoroan (ETO) ne’ebé fornese kombustível ba sentrál elétrika Hera no Betano.
“Serteza ami laiha osan atu selu kompletamente, maibé ita selu uitoan-uitoan. Daudaun ne’e, orsamentu duodésimu janeiru no fevereiru nian ami aprova millaun $3,6 hodi selu ba empreza SACOM no ba ETO aprova millaun $2,5 atu sustenta fornesementu kombustível ba sentrál elétrika sira”, tenik Salvador iha Palásiu Governu, kinta ne’e.
Governante ne’e realsa, orsamentu duodésimu labele selu hotu dívida ba empreza sira, maibé MOP kontinua tenta atubele jere hodi selu neineik liuhosi osan duodésimu kada fulan, nune’e labele afeta ba atividade kompañia, hodi kontinua fornese kombustível.
“Ita-nia projesaun 2020 ne’e, nesesidade ba kuantidade mina aumenta tanba nesedidade uzu elétrika mós sa’e ein-termu Mega Watt, tanba ne’e konsome mós aumenta”, nia akresenta.
Nia rekoñese, bainhira kuantidade konsome elétrika sa’e, automatikamente orsamentu ba kombustível mós aumenta, maibé ho orsamentu duodésimu la sufisiente atu selu.
“Ha’u agradese ba kompañia rua ne’e tanba Governu deve hela maibé kontinua fornese kombustível ba sentrál elétrika rua ne”, nia agradese.
Antes ne’e, Diretór Empreza SACOM Energy, Abílio de Araújo, hasoru-malu ho Primeiru-Ministru (PM), Taur Matan Ruak, hodi atualiza pontu situasaun nu’udar empreza ne’ebé durante ne’e fornese mina ba Sentrál Elétrika Betano, iha Postu Administrativu Betano, Munisípiu Manufahi.
Biban ne’e, Dirijente SACOM relata uitoan kona-ba selebrasaun kontratu entre empreza ne’e ho Governu, ne’ebé daudaun ne’e iha atrazu iha pagamentu.
“Konbustível sira hatama iha festa natál to’o mai iha fevereiru ne’e Governu seidauk selu. Ha’u mai dehan ba Primeiru-Ministru katak Governu seidauk selu hamutuk millaun $22, maibé ha’u dehan katak ha’u mós komprende difikuldade hirak-ne’e”, hateten Abílio Araújo iha Palásiu Governu, segunda ne’e.
Nia haktuir, iha tempu natál, SACOM konsege hatama ona kombustível ba Sentrál Elétrika Betano hamutuk litru millaun 14, hodi garante ahi lakan iha festa natál 2019 to’o iha janeiru 2020 konsege fornese litru 17.000-resin.
Relasiona ho daudaun ne’e Governu utiliza rejime doudesimál, Dirijente Empreza ne’e garante SACOM nafatin fornese kombustível maibé depende filafali ba finanseiru empreza nian.
Jornalista: Florencio Miranda Ximenes
Editora: Julia Chatarina
