Ministru Justisa (MJ) Manuel Cárceres da Costa, hasai fotografia ho investigadór kriminál husi PCIC na’in 30 ne’ebé foin simu pose iha edifísiu MSSI, Caicoli Dili, sesta (23/08/2019). Imajen/Espesiál

DILI, 27 fevereiru 2020 (TATOLI) – Pistola hamutuk 75 ne’ebé Governu liuhosi Ministériu Justisa (MJ) kompras ba Polísia Científica de Investigação Criminál (PCIC) sei to’o iha Timor-Leste iha marsu, tinan ne’e.

Notísia Relevante : Governu Sosa Uluk Pistola 50 ba PCIC

Diretór Nasionál PCIC, Vicente Fernandes e Brito, informa, prosesu akizisaun sosa arma servisu ne’e hala’o hosi kompañia distribuidór Sodarga Portugál no sei sosa hosi fabrika iha Suisa.

“Nia akizisaun prosesu hotu ona. Agora ita hein de’it atu kompañia fornese mai. Se laiha impedimentu ruma, iha fulan marsu, tinan ne’e, arma servisu ne’e bele to’o ona,” informa Vicente Fernandes e Brito, ohin, hodi responde jornalista sira iha Edifísiu PCIC, Caicoli, Dili.

Notísia Relevante : UE Apoia Ekipamentu Teste Forénsika ba PCIC

Nia hateten, arma servisu ne’e sei atribui ba investigadór PCIC atu suporta atividade investigasaun kriminál no prevensaun. Tanba PCIC mós hanesan ho polísia tuir regra normal iha mundu.

“Ha’u fó ezemplu, ezekusaun mandadu detensaun ba kumprimentu pena ka ezekusaun mandadu ba primeiru interrogatóriu judisiáriu liga ba servisu ne’e ba PCIC hala’o presiza mós arma servisu hanesan mós ho polísia,” hateten Vicente Fernandes e Brito.

Orsamentu ba akizisaun arma hirak nee ho valor $100.000.00 ne’ebé prevee iha Orsamentu Jerál Estadu (OJE) 2019.

Notísia Relevante : Governu Desidi Sosa Pistola Ba PCIC

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here