Diretór Institutu Defeza Nasionál (IDN), Donaciano Costa Gomes "Pedro Klamar Fuik". Imajen/Egas Cristóvão

DILI, 27 fevereiru 2020 (TATOLI) — Institutu Defeza Nasionál (IDN) ho Universidade da Paz (UNPAZ) asina ona akordu kooperasaun (MoU/Memorandum of Understanding)  hodi implementa programa durante tinan haat hodi troka kurríkulu, dosente no kontinua ho formasaun defeza seguransa ba joven universitáriu hosi UNPAZ.

Notísia Relevante :  IDN ho UNTL Estabelese Kooperasaun ba Kapasitasaun Defeza no Seguransa

Komunikadu imprensa hosi IDN ne’ebé haruka ba redasaun Ajénsia Tatoli, ohin, relata katak, komprometidu ho espíritu kooperasaun ne’e asina direita hosi Diretór IDN Kapitão-de-Mar-e-Guerra, Donaciano Costa Gomes “Pedro Klamar Fuik”, ho Magnífiku Reitór UNPAZ, Adolmado Soares Amaral , no asiste hosi Diretora Fundu Dezenvolvimentu Kapitál Umanu (FDCH), Leila Cárceres do Santos, iha salaun Comissão Nacional de Eleições (CNE), Dili, foin lalais ne’e.

“Oportunidade agora sei kontinua selebra protokolu ida  para depois bele iha troka kurríkulu, troka programa, troka  dosente nune’e mós partisipasaun ativa hosi alunu sira iha kualkér eventu ligadu ho formasaun defeza no seguransa ne’ebé mak IDN e organiza,” hateten Diretór IDN, Kapitão-de-Mar-e-Guerra, Donaciano Costa Gomes “Pedro Klamar Fuik” iha nia intervensaun iha ámbitu selebrasaun asina MoU ne’e.

Pedro Klamar Fuik fó sasin katak, Magnífiku Reitór, Saudozu Lucas da Costa, hanesan veteranu  ne’ebé iha hanoin ba defeza nasionál hanesan mós aman ida ba funda nasaun ida ne’e.

“Ita hein katak, ita nia instituisaun rua ne’e bele forma rekursu umanu Timoroan hotu-hotu, ita transforma rekursu umanu ne’ebé mak ita iha ba kapitál umanu.  Tanba ho kapitál umanu ne’ebé  di’ak  maka ita bele prienxe programa ba dezenvolvimentu nasionál,” afirma eis komandante Komponente Naval FALINTIL-Forsa Defeza Timor-Leste (F-FDTL)  ne’e.

Reitór UNPAZ, Adolmado Soares Amaral, hatete, liuhosi kooperasaun UNPAZ ho IDN  bele hatama iha kurríkulu no mós iha rekursu sira ne’ebé mak UNPAZ iha, bele ajuda iha UNPAZ rasik no mós iha IDN.

“Ho diretór IDN ko’alia kona-ba mensajen Professor Doutór Saudozu Lucas da Costa nian, mak iha ami nia mandatu, ami iha ona kompromisu hakarak asegura buat ne’ebé mak saudozu hakarak no realiza iha nia mehi sira. Ninia mehi ida, oinsá UNPAZ bele mós iha responsabilidade para atu bele ko’alia kona-ba defeza no seguransa,” hateten Adolmado Soares Amaral.

Nia hateten, UNPAZ iha fakuldade siénsia sosiaís umanu, nia programa kona-ba estudu ba pás rasik no mós ba relasaun internasionál.  UNPAZ haree atividade konferénsia barak  ne’ebé IDN organiza no UNPAZ bele partisipa.

Diretora FDCH, Leila Cárceres dos Santos, hato’o agradese wain ba IDN nia konvite ne’ebé konsidera ona FDCH hanesan entidade ne’ebé mak nia papél importante ba investimentu rekursu umanu iha Timor-Leste.

Nia dehan, FDCH sai sasin ba kooperasaun ne’ebé mak IDN hala’o ho UNPAZ tanba FDCH nia papél atu asegura jestaun finanseiru ba investimentu públiku iha área dezenvolvimentu rekursu umanu nasionál.

FDCH fiar katak, kooperasaun ne’e sei haforsa UNPAZ atu bele ajuda fó forsa ba juventude sira sai hanesan jerasaun foun ho kualidade ne’ebé di’ak no matenek no mós nakonu ho espíritu patriotizmu no nasionalizmu.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here