Atividade iha Portu Tibar. Imajen Tatoli/António Gonçalves

DILI, 27 fevereiru (TATOLI)–Governu liuhosi desizaun Konsellu Ministru (KM) estraordinária kinta ne’e, aprova Projetu Rezolusaun Governu, ne’ebé aprezenta husi Ministra Finansa Ein-ezersísiu, Sara Lobo Brites, kona-ba Rejime Tarifáriu Asosiadu ba Utilizasaun husi Portu Tibar no Servisu Asosiadu.

Rezolusaun ne’e atu prosede ba aprovasaun lista tarifa suplementár no akordu ba montante entre Estadu no konsensionáriu atubele publika iha Jornal Repúblika kona-ba lista integrál husi tarifa prinsipál no suplementár, nune’e prosede kobransa tarifa hahú husi inísiu ba períudu iha operasaun Portu Tibar.

“Ohin Konsellu Ministru hala’o soru-mutuk no aprova ona Projetu Rezolusaun Governu kona-ba Rejime Tarifáriu Asosiadu ba Utilizasaun Portu Tibar no Servisu Asosiadu”, informa Ministru Reforma Lejizlativa no Asuntu Parlamentár, Fidelis Manuel Leite Magalhães iha Palásiu Governu, kinta ne’e.

Kona-ba tarifa ne’ebé atu aplika, seidauk iha esplikasaun husi ezekutivu sira.

Daudaun ne’e, projetu konstrusaun Portu Tibar ne’ebé hahú iha 2018 no tuir planu sei ramata iha tinan 2021, atinje ona porsentu 20.

Konstrusaun Hahú iha 2018

Iha loron 30 agostu 2018, Primeiru-Ministru (PM), Taur Matan Ruak halo lansamentu ba konstrusaun Portu Tibar, ne’ebé tuir planu loron konstrusaun hahú husi loron lansamentu no sei ramata iha 30 agostu 2021.

Konstrusaun Portu Tibar, lokaliza iha kilómetru 10 hosi Oeste Dili, iha Baía Tibar, Munisípiu Liquiçá, hanesan infraestrutura prioritária ne’ebé identifika ona iha Planu Estratéjiku Dezenvolvimentu (PED) 2011-2030.

Projetu ho durasaun serbisu tinan tolu ne’e, hanesan konstrusaun nível internasionál, ne’ebé ezekuta liuhosi Timor Port S.A. ho modalidade Parseria Públika Privada (PPP) entre konsórsiu Bolloré no Governu Timor-Leste.

Ba konstrusaun ne’e, Governu aloka millaun $130, enkuantu Timor Port no Bolloré hamutuk miliaun $140, totál millaun $270 ba faze inísiu. Totál investimentu orsamentu ba Portu Tibar to’o tinan 30 ho valór millaun $500.

Liuhosi konkursu internasionál, Governu selesiona Bolloré Group (Parseiru Privadu) atu dezenvolve portu foun (green field port) ho modelu dezeñu, harii, ko-finansia, opera no transfere (Design Build Finance Operate & Transfer/DBFOT).

Bolloré Group nu’udar kompañia Francês koñesidu iha nível mundiál espesializada iha konsensaun portu no lojístika, no agora daudaun opera terminál kontentór hamutuk 16 iha nasaun oin-oin.

Atu hala’o dezenvolvimentu portu, Governu asina kontratu ho Timor Port S.A. (kompañia ne’ebé registradu iha Timor-Leste no na’in husi Bolloré Group) iha loron 3 juñu 2016 ba konsensaun tinan 30 nian, hafoin períu8du konsensaun, Timor-Port S.A. sei transfere fali portu internasionál ne’e (Portu Tibar) ba Governu Timor-Leste.

Tuir kontratu ho Governu, Timor Port S.A. bele halo sub-kontratu independentemente ba serbisu konstrusaun no operasaun ba entidade seluk no asegura entidade ne’ebé envolve hodi kumpre ho espesifikasaun téknika referida iha Kontratu Konsensaun.

Nune’e, konsesionária lansa independentemente konkursu internasionál no konklui tiha ona konkursu ne’e ho kompañia selesionadu China Harbour Engineering Company (CHEC) nu’udar parte ne’ebé manán ba konstrusaun ba Portu Tibar iha loron iha 12 dezembru 2017.

Parte Governu estabelese ona Unidade Jestaun Portu Baía Tibar hodi dedika totalmente ba implementasaun projetu ne’e, ho profisionál sira ne’ebé iha esperiénsia ona, tantu nasionál no internasionál, ne’ebé kombina ho koñesimentu nesesáriu hodi jere akordu Kontratu Konsensaun durante faze konstrusaun (téknika, seguransa, saúde no ambiente no legál).

Previstu kais rua ho metru 630, bele simu kontentór 8700.000 iha tinan ida nia laran.

Aleinde ne’e, durante faze konstrusaun, iha projesaun katak sei kria empregu ba ema na’in-500 ne’ebé maioria ba timoroan, nu’udar kompromisu husi konsensionária.

Hetan Prémiu Mellór Projetu 2018 Iha Rejiaun Ázia Pasífiku

IJ Globál fó prémiu “Mellór Projetu iha Tinan 2018” iha Rejiaun Ázia Pasífiku, ba Parseria Públika Privada (PPP) Portu Tibar iha Timor-Leste.

IJ Globál hanesan organizasaun líder mundiál iha infraestrutura no finansiamentu projetu no prémiu ne’e anúnsia iha loron 28 marsu 2019 iha Singapura.

Projetu Portu Tibar ne’e selesionadu entre projetu PPP ne’ebé realizadu iha país dezenvolvidu hotu iha Rejiaun Ázia Pasífiku.

Rekoñesimentu internasionál ne’e hanesan  dahuluk ba PPP ne’ebé dezenvolve iha Timor-Leste no nu’udar konkista boot ba Governu Timor-Leste. Nune’e mós hatudu dalan ba dezenvolvimentu husi projetu PPP ne’ebé fó rezultadu di’ak.

Jornalista: António Gusmão

Editora: Julia Chatarina

HAKEREK NO HATÁN

Please enter your comment!
Please enter your name here