Komandante Jerál PNTL, Komisáriu Faustino da Costa. Imajen/Eugénio Pereira

DILI, 27 fevereiru 2020 (TATOLI)—Komandante Jerál Polísia Nasionál Timor-Leste (PNTL), Komisáriu Faustino da Costa, apela nafatin ba kulakér Grupu Arte Marsiál (GAM) katak bainhira hakarak hala’o atividade tenke respeita lei númeru 5/2017 19 Abril hodi rejistu.

“Ohin, ha’u mós informa asuntu ne’e ba Prezidente Repúblika katak lei númeru 5/2017 19 Abril hateten, kulakér atividade Arte Marsiál nian bele hala’o ninia atividade maibé tenke rejistu. Depois de rejistu mak hala’o atividade. La’ós tanba rezolusuan ne’e governu revoga tiha, depois, ida-idak halo ninia atividade tuir ninia hakarak, la’e. La’ós hanesan ne’e. PNTL kontinua mantein uza leí númeru 5/2017 19 Abríl hodi halo ninia atuasaun,” dehan Komisáriu Faustino da Costa, ba jornalista sira hafoin hala’o enkontru semanál ho Prezidente Repúblika (PR), Francisco Guterres “Lú Olo” iha Palásiu Prezidensiál, Bairru-Pité, Dili, ohin.

Nia hatutan, GAM sira tenke rejistu mak bele hala’o atividade tanba PNTL fó hanoin beibeik ba GAM sira. Katak, nia esplika, maske rezolusaun Governu númeru 16/2013 nian ne’e revoga ka absolve maibé la signifika Grupu Arte Marsiál hotu-hotu halo atividade tuir sira-nia hakarak.

Líder másimu instituisaun seguransa ne’e esplika liután katak tenke halo tuir saida mak leí númeru 5/2017 19 Abríl hateten, tanba durante enkontru ho Xefe Estadu, asuntu ne’e mak nia levanta ba Prezidente Repúblika.

Antes ne’e, Primeiru-Ministru (PM), Taur Matan Ruak hateten, Rezolusaun Governu númeru 16/2013 kona-ba ekstinsaun Grupu Arte Marsiál (GAM) ne’ebé hasai iha loron 2 jullu 2013, la boot liu Leí númeru 5/2017 19 abríl, ne’ebé promulga husi Prezidente Repúblika iha 12 abríl 2017, kona-ba rejime jurídiku prátika Arte-Marsiál no Rituál sira, Arma Branka, inklui Rama Ambon no alterasaun ba Kódigu Penál.

Entretantu, Governu liuhosi reuniaun Konsellu Ministru (KM) iha kuarta 12 fevereiru 2020, KM aprova ona roposta Rezolusaun Governu ne’ebé aprezenta hosi Primeiru-Ministru (PM), Taur Matan Ruak, ba revogasaun Rezolusaun Governu númeru 16/2013 10 jullu, ne’ebé bandu Grupu Arte-Marsiál (GAM) sira hodi hala’o atividade.

Iha parte seluk, Ministru Reforma Lejizlativa no Asuntu Parlamentár, Fidelis Manuel Leite Magalhães informa, diploma legál ne’e rasik instroi Polísia Nasionál Timor-Leste (PNTL) atu intensifika asaun kombate krime sira kona-ba prátika ilísitu husi Arte Marsiál no Rituál sira.

Nia esplika, ho Rezolusaun Governu ne’e signifika katak GAM bele hala’o prátika maibé tenke tuir lei. Tanba, nia dehan, iha rezolusaun antes ne’e bandu labele hala’o prátika maibé hafoin revoga rezolusaun anteriór, agora bele hala’o prátika maibé tenke tuir lei.

Notísia relevante: KM Aprova Rezolusaun Reativa Arte-Marsiál

Jornalista : Cipriano Colo

Editór       : Cancio Ximenes

INFORMASAUN

HAKEREK NO HATÁN

Please enter your comment!
Please enter your name here