Sekretáriu Ezekutivu Komisaun Nasionál Kombate HIV-SIDA, Daniel Marçal

DILI, 27 fevereiru 2020 (TATOLI)-Sekretáriu Ezekutivu ba Komisaun Nasionál Kombate HIV-SIDA, Daniel Marçal husu ba Parlamentu Nasionál atu kria lei ruma hodi regula funsionamentu otél no uma kos sira iha Dili laran tanba hamosu relasaun livre ba joven sira.

Nia dehan dadaun ne’e nia parte identifika Otél balun iha Dili laran ne’ebé fó aluga kuartu ba kliente sira ho durasaun tempu oras ida to’o rua.

”Otél sira oras ida oras rua ne’e nia funsaun saida atu fasilita saida no mós kos sira  iha Timor ne’e mós livre loos tanba ne’e estadu tenke kria lei ruma atu regula buat sira ne’e,”katak  Daniel Marcal ba Estudante Institutu Superiór Cristál, Ohin.

Tuir nia fatór hirak ne’e maka kontribui ba númeru moras HIV-SIDA tanba kria relasaun seksuál livre.

”Entaun agora se mak atu ba regula otél ho kos sira ne’e estadu mak tenke regula halo lei ruma ba ida ne’e para bele minimiza risku balun,”tenik tan.

Tuir nia relasaun seksuál livre fasil atu hetan moras HIV-SIDA tanba ne’e maka  joven sira tenke hadook aan hosi ransu livre.

Tuir relatóriu hosi Ministériu Saúde katak to’o fulan-setembru 2019, timoroan hamutuk 1039 afetadu ona ba HIV-SIDA no hosi númeru ne’e ema na’in 131 mak mate ona.

Tanba ne’e, Komisaun sei kontinua servisu hamutuk ho Instituisaun Estadu, NGO, parseiru dezenvolvimentu no seluk tan hodi halo prevensaun no kombate ba SIDA iha Timor-Leste.

Jornalista : Felicidade Ximenes

Editór       : Agapito dos Santos

INFORMASAUN

HAKEREK NO HATÁN

Please enter your comment!
Please enter your name here