Deputada CNRT, Carmelita Caetano Moniz. Imajen/dok.TATOLI

DILI, 27 fevereiru 2020 (TATOLI)—Komisaun Jurisdisaun Partidu Congresso Nacional de Reconstrução de Timor (CNRT), Carmelita Caetano Monis hateten, Aliansa Mudansa Ba Progresso (AMP) hotu ona hafoin Primeiru-Ministru simu pose maibé Aliansa Maioria Parlamentár (AMP) nakloke ba partidu seluk iha konjuntura polítika atuál.

“Tuir ha’u-nia pontu devista Aliansa Maioria Parlamentár loke ba ema hotu. Tanba, ida antes eleisaun ne’e, Aliansa Mudansa Ba Progresu, hafoin eleisaun kuandu tama ona iha Parlamentu Nasionál ami iha Aliansa Maioria Parlamentár. Agora sei nakloke ba sé de’it hakarak hamutuk iha Aliansa Maioria Parlamentár no sei nakloke hela,” Komisaun Jurisdisaun Partidu CNRT, Carmelita Caetano Monis, haklaken ba jornalista sira iha resintu Parlamentu Nasionál, kinta ne’e.

Nia esplika, bolu naran Aliansa Mudansa Ba Progresu ne’e kompostu hosi Partidu Congresso Nacional de Recontrução de Timor (CNRT), Partidu Libertasaun Populár (PLP) no Partidu Kmanek Haburas Unidade Nasionál Timor Oan (KHUNTO).

“Iha ne’ebá, ami iha akordu ida iha pre-eleitorál ne’ebé partidu tolu ne’e asina. Iha akordu ne’e iha klauzula ida hateten katak koligasaun ida Aliansa Mudansa Ba Progresu ne’e hotu iha loron 30 hafoin pose Primeiru-Ministru,” nia hateten.

Nia argumenta, ho artigu ida-ne’e mak fó dalan partidu CNRT, PLP no KHUNTO iha bankada ketak-ketak iha Parlamentu Nasionál. Se artigu ida-ne’e laiha, sira labele iha bankada. Maibé, sira tenke ba ho bankada ida de’it katak bankada Aliansa Mudansa Ba Progresu maibé lae.

“Entaun, oinsá ita haree ba Aliansa Maioria Parlamentár, Aliansa Mudansa Ba Progresu ne’e ba fin eleitorál de’it, para eleisaun hotu to’o loron 30 depois tomada pose Primeiru-Ministru. Aliansa ida agora ami halo daudaun iha Parlamentu Nasionál bolu naran Aliansa Maioria Parlamentár ho konjuntura foun ne’ebé ke iha inklui UDT-FM no PUDD,” nia hateten.

Nia subliña, agora daudaun ne’e Aliansa Maioria Parlamentár ne’ebé kompostu hosi CNRT, PLP, KHUNTO, Frente-Mudansa no UDT.

“Ha’u seidauk haree partidu ida deklara loloos, nia sai hosi Aliansa Maioria Parlamentár ne’e, seidauk. Nein PLP. Nein CNRT. Nein KHUNTO. Nein UDT no nein FM. Ne’ebé, ha’u sente katak se konjuntura polítika foun ida agora hanesan CNRT, PD, KHUNTO, UDT, FM no PUDD ne’e, Aliansa Maioria Parlamentár nakloke ba partidu hotu-hotu ne’ebé iha vontade di’ak atu forma Aliansa Maioria Parlamentár,” nia esplika.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here