Imajen espesiál

DILI, 26 fevereiru 2020 (TATOLI)–Xefe Estadu, Francisco Guterres “Lú Olo”, konsidera Kuarezma nu’udár tempu oportunu atu halo reflesaun ba ida-idak nia moris.

Tempu kuarezma, nia hatutan, tempu ida ne’ebé konvida sarani ida-idak atu halo reflesaun liuliu atu hadi’a ema ida-idak nia relasaun ho Maromak no hadi’a relasaun entre ema ida ho ema seluk.

Xefe Estadu hato’o konsiderasaun ne’e ba jornalista sira hafoin partisipa Misa Kuarta Feira Sinzas iha Igreja Nossa Senhora Immaculada da Conceicão, Vila Verde, Dili, ohin.

“Ohin, ha’u tuir misa Sinzas ninian, hodi hahú tempu Kuarezma. Tanba ne’e, ho tempu ida ne’e, ita hotu bele hahú halo reflesaun fila fali ba ita-nia aan hanesan sarani, liuliu hadi’a ita-nia relasaun ho Nai Maromak. Tempu ida ne’e daudaun ita hotu sei la’o tuir, atu bele hanoin hikas ita-nia moris rasik,” Xefe estadu ne’e haktuir.

Xefe Estadu nia hanoin ne’e, la sees no dook husi  reflesaun peinsipál ne’ebe Arsebispu Metropolitana Arkedioseze Dili, Dom Virgílio do Carmo da Silva, SDB, foti husi Evanjellu husi Saun Mateus (6:1-6.16-18) nian ne’ebé hateten, ‘Tempu Kuarezma aprezenta dalan tolu hanesan Orasaun, Karidade no Jejún nu’udár investimentu boot liu ba moris rohan laek’.

Iha misa refere, Prezidente Repúblika akompañadu husi nia espoza, Cidália Mouzinho Nobre Lopez Guterres.

Notísia Relevante: Orasaun, Karidade no Jejún Mak Investimentu Boot Ba Moris Rohan Laek

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here