Prezidenti da Republika, Francisco Guterres Lu Olo.Imajen/Antonio Goncalves

DILI, 26 fevereiru 2020 (TATOLI)–Prezidente Repúblika (PR), Francisco Guterres “Lú Olo”, lakohi ko’alia kona-ba pedidu Demisaun ne’ebé aprezenta husi Primeiru Ministru (PM), Taur Matan Ruak iha segunda 24 fevereiru tinan ne’e.

“Ha’u la ko’alia kona-ba ida ne’e,” dehan PR Lú Olo hodi hatán ba jornalista sira, hafoin partisipa misa Kuarta Feira Sinzas iha Igreja Katedral Nossa Senhora Immaculada da Conceicão, Vila Verde Dili, ohin.

Prezidente Repúblika Francisco Guterres “Lú Olo” infroma katak karta demisaun hosi Primeiru-Ministru ne’e iha ona niia meza, tanba ne’e nia sei tetu molok atu dekreta.

Entretantu, Primeiru-Ministru (PM), Taur Matan Ruak, aprezenta ona karta demisaun ba Prezidente Repúblika (PR) iha segunda (24/2/2020) no iha tersa (25/2/2020) ne’e, liuhusi enkontru semanál iha Palásiu Prezidensiál Bairru-Pite, Dili.

Hafoin enkontru, Primeiru-Ministru Taur Matan Ruak manifesta ninia hanoin hodi hateten demisaun ne’e válidu kuandu Prezidente dekreta ona, enkuantu seidauk dekreta, nia sei kontinua hanesan Primeiru-Ministru atu garante atividade governativa iha nasaun ne’e.

Kona-ba durasaun tempu atu dekreta, Primeiru-Ministru Taur Matan Ruak hateten ida ne’e depende ba Prezidente Repúblika nia desizaun.

Primeiru-Ministru Taur Matan Ruak aprezenta karta demisaun ne’e, tanba konsidera koligasaun foun iha ona liuhosi asina akta koligasaun foun husi partidu lima hamutuk ho parrtidu CNRT ne’ebé hala’o iha iha sábadu 22 fevereiru 2020.

Akta koligasaun foun ne’e, asina husi reprezenta husi Prezidente Partidu CNRT, Kay Rala Xanana Gusmão, Prezidente PD, Mariano Assanami Sabino, Prezidente KHUNTO, Armanda Berta dos Santos, Prezidente Ein Ezersísiu UDT, Rudolfo Aprarício Guterres, Prezidente Interinu FM, Egídio de Jesus, no Prezidente PUDD, António de Sá Benevides.

Notísia Relevante: PM Taur Aprezenta Ona Karta Demisaun

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here