Klube Fitun Estudante Lorosa’e (FIEL) . Imajen/LFA

DILI, 25 fevereiru 2020 (TATOLI)-Prezidente klube Fitun Estudante Lorosa’e (FIEL), José da Conseição, hateten ninia klube iha ona ambisaun boot atu kompete ho di’ak liután hodi hakat liu bareira iha primeira divizaun Liga Futeból Amadora (LFA) époka 2020.

“Ami iha ona alvú, tinan ne’e ami tenke hakat ba primeira divizaun. Ami preparadu tebes hodi hasoru jogu da-lima ne’e,” dehan Nia ba TATOLI, iha edifísiu TATOLI, Faról Dili, tersa (25/02/2020).

José esplika nia klube oras ne’e iha kampu rasik hodi fasilita treinamentu ba jogadór sira hodi halo preparasaun ho didiak antes hakat ba eventu ne’e LFA.

“Dadauk ne’e ami-nia parte prepara ona kampu rasik hodi halao treinamentu. Tanba ne’e ekipa ne’e solídu tebes iha preparasaun,”nia hatutan.

FIEL sei kontinua mantein nafatin jogadór tuan no laiha planu atu kontratu tan jogadór foun hodi reforsa klube ne’e iha époka LFA 2020.

Tuir Nia iha 2020 Governu sei lá oferese tan subsídiu ba klube sira ne’ebé lakon simu osan $ 700 no manan $1500 kada jogu.

“Governu dehan hapara ona subsidiu ba ami. Ida ne’e sai hanesan susar bo’ot ida mai ami maibé ami tenta nafatin hodi buka meiu oinsá mak bele iha osan atu kompete iha jogu,”nia haktuir liután.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here