Xefe Koordenador Badan Narkotika Nasional (BNN) Atambua, Komisariu Polisia, Apolinario da Silva, fó korajen ba kazal Timoroan atu simu desizaun Tribunal Atambua nian. Imajen/Eugénio Pereira

ATAMBUA, 26 fevereiru 2020 (TATOLI)- Xefe Koordenadór Badan Narkotika Nasional (BNN) Atambua, Indonézia, Komisáriu Polísia Apolio da Silva, husu ba timoroan sira atu kuidadu atu labele sai vítima hodi transporta fali droga ba Indonézia.

Notísia Relevante : PNTL ho BNN-RI Sei Estabelese Formasaun Identifika Tipu Droga

Xefe Koordenadór Badan Narkotika Nasionál (BNN) Atambua, Komisáriu Polísia, Apolio da Silva. Imajen/Eugénio Pereira

Komisáriu Apolio da Silva dehan, lei Indonézia nian forte tebes no la tolera ba kualkér sidadaun ne’ebé komete droga no halo atividade tranzasaun droga sei hetan pena kastigu todan no pena morte.

Nia hatutan, ohin loron ema estranjeiru barak maka uza timoroan sira sai instrumentu hodi transporta droga husi rai-li’ur mai Timor-Leste hodi fa’an fali ba Indonézia.

Tuir nia haree, kazu kazál timoroan, José Soares Pereira ho Angela Soares, ne’ebé Tribunál Distritál Atambua, Indonézia, ohin, kondena menus hosi tinan 20 ne’e atu bolu atensaun hodi kuidadu-an atu kazu ne’e labele akontese iha futuru.

“Ha’u husu ba povu timoroan sira ne’ebé ha’u hadomi tebes atu imi kuidadu-an. Ema ruma haruka imi lori sasán ne’ebé ita rasik la hatene, di’akliu husu para hatene, tanba entrada mai área Indonézia nian iha aparellu kompletu no sensitivu tebes atu deteta kualkér sasán ne’ebé tama liuhosi mákina Raiu-X,” hateten Apolio da Silva ba Agência Tatoli, ohin, iha Tribunál Distritál Atambua.

Notísia Relevante : Tribunál Atambua Fó Sentensa Pena Prizaun Tinan 10 Ba José Soares no Tinan Lima Ba Angela Soares

Iha parte seluk, Xefe BNN Apolio mós husu ba Governu Indonézia no Governu Timor-Leste presiza estabelese ona akordu estradisaun entre Police-to-Police (PtoP) no Government-to-Government (GtoG).

 Nia hatutan, akordu PtoP no GtoG bainhira kria ona sei fasilita nasaun rua atu iha baze legál kontrola sidadaun nasaun rua bainhira halo kazu krime ou lori droga tama ba rai seluk, Timor-Leste bele kriminaliza sidadaun ne’e iha rai seluk hodi lori fila ba Timor-Leste.

Foin lalais ne’e, Komandu PNTL no BNN-RI mós asina ona akordu kooperasaun hodi servisu hamutuk identifika tipu droga ne’ebé ema kontinua lori tama sai rai rua bele kontrola hamutuk.

Kooperasaun ne’e rasik estabelese liuhosi vizita Adjuntu BNN-RI, Inspetór Polisia, Puji Sarwono durante hala’o enkontru ho Komandante Jerál PNTL, Komisáriu  Faustino da Costa iha loron 19 dezembru 2019.

Iha fatin hanesan, Konsuladu Timor-Leste ba Kupang, Jesuino dos Reis Matos “Zito” dehan, sira nia parte sei aprezenta ideia ne’e ba Embaixadór Timor-Leste ba Jakarta, hodi hato’o ba Governu liuhosi Ministériu Negósiu Estranjeiru no Kooperasaun atu aprezenta ba Konsellu Ministru.

Konsuladu ne’e dehan, akordu estradisaun ne’e mós importante tebes ba Governu Timor-Leste atu estabelese ho Governu Indonézia inklui Governu Austrália no nasaun seluk tan.

Nia parte mós sei husu ba Autoridade Indonézia hodi koopera halo sosializasaun ba povu fronteira kona-ba impaktu konsumu droga hodi alerta atensaun ba povu rai rua atu kuidadu-aan.

Tuir nia haree katak, Timor-Leste labele sai fatin tránzitu ba droga hodi aproveita fali joven sai alvu konsumu no fa’an droga  ou transporta droga ba rai li’ur.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here