Ekipa Alfándega uza ekipamentu tablet ezaminasaun ba sasan merkadoria iha Portu Dili. Imajen/Florencio Miranda Ximenes

DILI, 25 fevereiru 2020 (TATOLI) – United Nations Conference on Trade and Development (UNCTAD) fó apoia ekipamentu tablet unidade tolu ho marka Samsung Galaxy Tab S3, hodi fasilita Autoridade Aduaneiru (AA/Alfándega) iha Portu Dili atu halo inspesaun no ezeminasaun ba sasan merkadoria sira ne’ebé tama-sai Portu Dili.

UNCTAD fó apoiu ekipamentu hirak ne’e, liuhosi Programa Dezenvolvimentu Nasaun Unida (UNDP-sigla inglés) no Ajénsia Dezenvolvimentu Internasionál Estadu Unidu Amérika (USAID-sigla inglés), hodi fó apoia ba Ministériu Finansa liuhosi Alfándega.

“Ita apresia no agredese tebes ba ajénsia  UNCTAD, ne’ebé fó apoiu ekipamentu atu suporta ita nia servisu iha ezaminasaun no inspesaun fíziku ba sasan merkadoria ne’ebé tama ita nia rai liuhosi Portu Dili”, tenik Diretór Nasionál Operasaun AA, Júlio José Ximenes iha Portu Dili, tersa ne’e.

Nune’e, Dirijente ne’e husu ba ekipa AA ne’ebé kontrola sasan merkadoria, atu uza fasilidade hirak ne’e ho resposabilidade tanba bele fasilita atu aselera relatóriu ezaminasaun ba Sistema ASYCUDA World.

Nia afirma, lansamentu ekipamentu ne’e ho objetivu atu Alfándega hetan apoia husi USAID ho funsaun atu ofisializa Alfándega sira atu halo ezaminasaun ba merkadoria automatikamente, ho ninia rezultadu ezaminasaun ne’e asesu direitamente ba Sistema ASYCUDA World.

Júlio José Ximenes rekoñese, fasilidade ne’e tulun atu ezamina no halo inspesaun ba sasan merkadoria ne’ebé la deklara no todan, ne’ebé rekonsilia ho dokumentu sira hodi bele halo diretamente relatóriu ba Sistema ASYCUDA World atubele prosesa ninia pagamentu.

“Ha’u husu ita boot sira (ofisiál Alfándega) iha portu Dili atu uza ho resposabilidade no proibidu atu lori ba uma tanba sasan estadu nian”, nia realsa.

Maski nune’e, nia dehan tan ekipamentu sei limitadu tanba ne’e presiza utiliza ho di’ak hodi bele fasilita serbisu ho lalais no profisionál atu serbí interese komún.

Ho nune’e, Dirijente ne’e  husu ba ajénsia internasionál sira atu kontinua apoia AA hodi mellora tan atendimentu públiku ho di’ak.

Parte hanesan, Xefe USAID ba Projetu Reforma Aduaneira, Mark Hamill, agradese ba  AA ninia kooperasaun ne’ebé di’ak tebes.

Nia iha esperansa, ekipamentu ne’e bele fasilita ekipa sira ninia serbisu hodi halo ativividade merkadoria ne’ebé tama husi Portu Dili.

Hafoin entrega ekipamentu ne’e ba Diresaun Jerál AA iha Portu Dili, ekipa ofisiál Alfándega halo kedan inspesaun no ezaminasaun ba sasan merkadoria sira iha Portu Dili.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here