Ilustrasaun Ai-han. Imajen/Espesiál

DILI, 25 fevereiru 2020 (TATOLI) – Programa Ai-han ba Mundu (WFP-World Food Programme), hamutuk ho Konsellu Nasionál Seguransa no Soberania Ai-han no Nutrisaun iha Timor-Leste (KONSSANTIL), ohin lansa ona relatóriu Prienxe Lakuna Nutriente (FNG-Fill the Nutrient), ne’ebé haree ba nesesidade nutrisaun timoroan, liuliu oinsá ema iha kbiit natoon hodi bele hola no asesu ai-han nutritivu sira.

Rezultadu xave relatóriu ne’e hatudu katak iha uma-kain barak mak konsome ona ai-han ne’ebé ladun nutritivu no la iha diversidade, liuliu grupu vulneravel sira hanesan feto, labarik no adolsente feto sira.

“Inan isin-rua no inan fó-susu iha risku boot hetan má-nutrisaun, enkuantu adolsente feto sira iha risku boot hetan defisiénsia mikro-nutriente”,  refere nota husi WFP iha ámbitu lansamentu relatóriu rezultadu teste fortikasaun foos iha Otél Timor, tersa ne’e.

 Relatóriu ne’e konfirma, Governu implementa ona polítika nutrisaun iha prátika hodi redús má-nutrisaun no haforsa protesaun sosiál.

“Liuhosi kolaborasaun di’ak ho liña ministériu sira, hamutuk ho KONSSANTIL no WFP, sei kontinua fornese suporta ba Governu Timor-Leste hodi atinje zero hamlaha. Ami espera katak relatóriu ne’e sei sai nu’udar matadalan hodi kria polítika no programa ida-ne’ebé efetivu no mós hadi’a nutrisauun no seguransa ai-han iha Timor-Leste”, informa reprezentante WFP, Dagen Liu.

Iha parte seluk, Sekretáriu KONSSANTIL, Justino dos Santos Silva garante katak relatóriu FNG sei tulun Governu komprende barreira hodi asesu ba ai-han nutritivu entre uma-kain ne’ebé diferente.

“Ida-ne’e sei ajuda mós ita hodi mai ho polítika no programa ida-ne’ebé forte, nune’e bele hetan solusaun ba barreira hirak ne’e ba timoroan”, nia esplika.

Entretantu, prosesu analiza relatóriu FNG patrosinadu husi parseiru no doadór sira hanesan Organizasaun ba Ai-han no Agrikultura (FAO-Food and Agriculture Organization), Organizasaun Nasaun Unida ba Fundu ba Labarik (UNICEF-United Nations Children’s Fund), Organizasaun Mundiál Saúde (OMS), Uniaun Europeia (UE), Ajénsia Kooperasaun Internasionál Koreana (KOICA-Korea International Cooperation Agency) no USAID- Avanza Agricultura (United States Agency for International Development).

Jornalista: Antónia Gusmão

Editora: Julia Chatarina

 

 

HAKEREK NO HATÁN

Please enter your comment!
Please enter your name here