Vise-Ministru Administrasaun Estatál, Abílio José Caetano. Imajen TATOLI/Egas Cristóvão

DILI, 25 fevereiru 2020 (TATOLI)—Vise-Ministru Administrasaun Estatál (MAE), Abílio José Caetano, ohin, aprezenta relatóriu dezastre naturál ba Primeiru-Ministru (PM), Taur Matan Ruak, tanba relatória ne’ebé MAE aprezenta uluk ne’e la kompleta ho dadus.

“Ohin ha’u mai hasoru Primeiru Ministru atu aprezenta relatóriu ne’ebé ko’alia kona-ba dezastre naturál. Tanba, iha ha’u-nia relatóriu laiha dadus tanba ne’e senór Primeiru Ministru bolu ha’u. Liuliu dadus kona-ba dezastre naturál ne’ebé akontese iha Munisípiu Dili, iha 29-30 dezembru nian,” dehan Abilio José Caetano ba jornalista sira hafoin hala’o sorumutu ho Primeiru-Ministru Taur Matan Ruak iha Palásiu Govenu, Dili, ohin.

Nia hatutan, aleinde ida ne’e, PM husu MAE atu involve autoridade lokál sira para bele identifika oinsá halo rekonstrusaun ruma kona-ba valeta no oinsá alarga tan valeta sira. Liuliu, nia dehan, atu involve autoridade lokál sira atu nune’e sira bele halo observasaun ba valeta sira hahú husi foho hún to’o tasi.

Uluk, nia esplika, iha portugés nia tempu valeta ne’ebé mak simu udan-been ne’e husi foho mak ba tasi. Maibé, nia informa, agora ne’e la’e maibé valeta ne’e husi fali estrada klaran mak ba tama fali tasi.

Relatóriu hirak ne’e, nia haktuir, MAE husu ba Ministériu Obras Públika (MOP) no Ajénsia Dezenvolvimentu Nasionál (ADN) para halo estudu ruma iha sidade laran nomós ba Xefe Suku sira atu halo re-estrutura ba valeta.

Jornalista : Osória Marques

Editór : Cancio Ximenes

HAKEREK NO HATÁN

Please enter your comment!
Please enter your name here