Ministra Saude En Ezersisiu atual Vise Ministra Saude, Élia A.A.Dos Reis Amaral, akompaña husi Prezidente Komisaun Funsaun Públika (CFP), Faustino Gomes Cardoso no Diretor Ezekutivu HNGV, Aniceto Cardoso Barreto, fó pose ba Kargu Xefia Unidades iha HNGV. Tersa (16/4/2019). Imajen/Egas Cristovão

DILI, 24 fevereiru 2020 (TATOLI)-Prezidente Komisaun Funsaun Públika (CFP-sigla portugés) Faustino Cardoso segunda ohin, hamutuk ho Vise Ministra Kuidadu Saúde Primária, Elia dos Reis Amaral fó pose ba kargu xefia na’in 15 iha Ministériu Saúde ho mandatu tinan haat hahú 2020-2024.

Kargu Xefia na’in 15 ne’e kompostu hosi Diretóra Jerál Prestasaun Saúde, Odete da Silva Viegas, Diretór Jerál Gabinete Kualidade Saúde, Feliciano da Costa Amaral Pinto, Diretór Ezekutivu Servisu Autónomu Medikamentu Ekipamentu Saúde (SAMES),Santana Martins.

Notísia Relevante :MS Fó Pose Ba Kargu Xefia HNGV

Celia Alexandre Gusmão dos Santos assume kargu nu’udar Diretóra Ezekutivu Institutu Nasionál Saúde, Endang Soares da Silva, hanesan Diretóra Ezekutiva Laboratóriu Nasionál, Inspetór Jerál Saúde maka Duarte Ximenes, Diretór Nasionál Orsamentu Jestaun no Finansa, Marcelo Amaral, Diretór Nasionál Aprovizionamentu maka Bernadino Armindo da Silva.

Diretór Nasionál Gabinete Polítika Planeamentu Kooperasaun Saúde assume hosi Narcísio Fernandes, Nilton do Carmo da Silva hanesan Diretór Nasionál Apoiu Servisu Ospitalares, Diretóra Nasionál Kontrolu Doensa maka Josefina Clarinha João.

Isabel Maria Gomes hanesan Diretóra Nasionál Saúde Publika, Diretór Nasionál Farmasia no Medikamentu maka Alipio Gusmão Lopes. Diretór Nasionál Administrasaun Lojístika patrimóniu maka Valentino Lisboa Marçal no Diretór Nasionál Gabinete Lisensieamentu Rejístu Atividade Saúde assume hosi Hitór da Costa Pereira.

Iha deskursu Prezidente KFP, Faustino Cardoso hateten Ministériu Saúde servisu hamutuk ho KFP maka halo prosesu selesaun to’o teste ba kandidatu sira tuir méritu hodi garante funsionamentu Ministériu Saúde.

‘’Prosesu ida ne’e prosesu Ministériu saúde nian hahú kedas husi inisíu to’o ohin loron hodi halo termu de aseitasaun tan ne’e mak Komisaun Funsaun Publika nu’udar vokál ida atu tau matan ba prosesu oinsá para bele la’o tuir regra prosedimentu ne’ebé  lei estabelese,”esplika Prezidente KFP iha Palasiu Sinzas Caicoli,ohin.

Faustino Cardoso informa aplikante hamutuk 104 mak aplika ba vaga 15 ne’e ekipa juri halo halo selesaun ba dokumentu pasa ema hamutuk haat nulu resin no ikus na’in 15 eskolla hodi assume kargu hirak ne’e.

Iha biban hanesan Vise Ministra Kuidadu Saúde Primária, Elia dos Reis Amaral iha ninia deskursu agradese ba ekipa juri ne’ebé lidera diretamente hosi Eis Ministru Saúde, Sergio Lobo.

Governante ne’e mós agradese ba kargu Xefia sesante tanba ho sira-nia apoiu maka hamutuk dezenvolve MS ho di’ak to’o ohin, tanba ne’e nia mós husu ba emposadu sira atu servisu di’ak liután ba futuru.

‘’Ministériu Saúde iha responsabilidade konstitusionál atu retein hodi asegura katak funsionáriu sira hotu ne’ebé uluk okupa kargu diresaun bele ezerse kna’ar  komputivel husi sira-nia abilitasaun akadémika tuir kareira profisionál,’’dehan Vise Ministra Saúde.

Entretantu, iha okaziaun ne’e Vise MS mós entrega mós sertifikadu apresiasaun ba Kargu Xefia sesante hamutuk ema na’in sia, hanesan Pedro Canísio, Francisco Borges, António Bonito, Odete Maria Freitas Belo, António da Costa, Alebrto Martins, Horacio Sarmento, Delfin Pereira no Natalio Araújo.

 Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here