Funsionáriu AIFAESA hamutuk ho Polisía Nasionál Timor-Leste halo distruisaun ba produtu ne’ebé AIFAESA durante halo apreensaun ba loja sira iha Kapitál Dili. Distruisaun ne'e halo iha iha Tibar, tersa (25/02). Imajen/António Gonçalves

DILI, 25 Fevereiru 2020 (TATOLI) – Diretór Operasaun Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA), Gabriel da Costa, informa empreza ne’ebé maka komete infrasaun ka irregularidade, liu-liu fa’an hahan liu prazu, AIFAESA sei foti medida hodi taka ninia atividade ekonómika.

“Ita-nia operadór atividade ekonómika sira, kuandu komete infrasaun dala-tolu iha tinan-ida nian laran, ami bele taka sira ninia atividade kompañia”, nia dehan hafoin ramata halo destruisaun ba produtu apreensaun iha Tibar, tersa ne’e.

Nia refere kona-ba kazu akontese iha loja Lucky Market, Audian, komete ona infrasaun dala barak, iha tinan 2018 kompañia refere hatama serveja mai Timor-Leste la ho dalan legál no iha 2019 kontinua komete infrasaun hanesan fa’an Ayam Potong liu prazu.

Momentu ne’ebá parte AIFAESA hetan informasaun iha novembru 2019 no halo kedan segel ba hahan no bandu labele fa’an.

“Ohin ita mós halo destruisaun ba iha Ayam Potong ne’ebé ami halo segel iha sira nia loja no lori mai halo destruisaun. Kona-ba kazu serveja ne’ebé sira hatama mai iha 2018, daudaun ne’e ami sei segel hela iha sira nia fatin tanba ida  ne’e sira hatama mai la ho dalan legal entaun ami halo prosesu ba iha Ministériu Públiku no agora hein desizaun Tribunal atu halo detruisaun”, Gabriel relata.

Nia realsa, kompañia Lucky Market komete ona infrasaun barak iha tinan ida nia laran, tanba ne’e parte AIFAESA koordena ona ho Servisu Rejistrasaun no Verifikasaun Emprezariál (SERVE) hodi hapara lisensa negósiu no atividade ekonómika.

Nia dehan tan, bainhira empreza ne’e rezolve di’ak ho parte AIFAESA maka foin loke filafali sira ninia atividade.

“Kazu Lucky Market nian kona-ba Ayam Potong liu prazu ne’e, foin daudaun ami halo segel iha sira nia loja. Tinan kotuk parte kompañia Lucky Market koopera di’ak tebes ho ami nian parte jurídiku hodi esklarese kona-ba sira nia razaun to’o komete infrasaun”, haktuir Gabriel.

Maski nune’e, Diretór Operasaun ne’e ladún hatene totál osan ne’ebé kompañia Lucky Market tenki selu hanesan koima ba AIFAESA, relasiona ho sira nia iregularidade ne’ebé maka kompañia ne’e komete, tanba prosesu atu selu koima, husi parte jurídiku AIFAESA maka hatene.

“Ami halo ezekusaun orden operasaun nian, ba kompañia ne’ebé maka fa’an produtu liu prazu no hahan la saudável. Ami halo inspesaun no apreensaun hodi relata ba sira, maibé tuir lei AIFAESA nian, kompañia ne’ebé komete infrasaun grave tenke selu koima $30.000, enkuantu komete infrasaun kama’an hetan multa $10.000”, Gabriel subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here