Udan boot ne’ebé akontese iha sesta (21/02/2020) halo mota tun makas sobu uma eskola ida iha Igreja Bobonaro nian. Imajen/Espesiál Manuel Branco

DILI, 24 fevereiru 2020 (TATOLI) – Sekretáriu Estadu Protesaun Sivíl (SEPS), Alexandrino Xavier de Araújo, ohin, iha Aplasia Governu, aprezenta relatóriu ba Primeiru Ministru Taur Matan Ruak, kona-ba mota sobu uma komunidade nian hamutuk ualu (8)  iha Aldeia Sabuli, Postu Administrativu Metinaro, Munisípiu Dili, foin lalais ne’e.

Sekretariu Estadu ba Protesaun Sivíl, Alexandrino Xavier Araújo. Imajen/ Egas Cristóvão

Inundasaun ne’ebé akontese iha sábadu (22/02/2020), tuku 13:00 Otl, hlao Mota Sabuli ho Mota Behokir  tuun maka’as hodi sobu  komunidade sira nia hela fatin.

Iha akontesimentu, Sekretáriu Estadu Alexandrino Xavier Araújo ho ekipa liña ministeriál liuhosi Ministériu Obra Públika (MOP), Diresaun Nasionál Protesaun Sivíl no Ministériu Solidariedade Sosiál no Inkluzaun (MSSI) too kedas iha fatin hodi observa no evakua populasaun hodi kontinua fó apoiu umanitáriu.

“Ita fó ona apoiu ba vítima sira no agora ekipa normaliza hela situasaun iha Metinaro,” SEPS Alexandrino Xavier de Araújo hateten ba jornalista sira.

Oras ne’e daudauk ekipa Obra Públiku hatún ona ekipamentu pezadu hodi dudu rai no taka mota dalan atu dezvia mota labele kontinua sobu povu nia uma.

Tuir dadus inundasaun provizóriu ne’ebé akontese iha territóriu Timor-Leste durante tinan 2019 too 2020 rejista hamutuk kazu 500-resin. Hosi dadus ne’e, governu fó ona apoiu emerjénsia ba vítima balun hodi hein orsamentu foun ida governu sei kontinua sosa materiál konstrusaun hodi rekupera vítima sira nia sofrimentu.

Mota Sobu Eskola Ida iha Bobonaro

Kondisaun Eskola ne’ebé mota sobu. Imajen/Espesiál

Iha parte seluk, Sekretáriu Estadu Alexandrino dehan, governu mós simu ona relatóriu kona-ba mota sobu uma eskola ida iha Igreja Nossa Señora Imaculanda da Concenção de Bobonaro, hafoin rai udan boot akontese iha sesta (21/02/2020).

SEPS koordena ona ho Ministériu Edukasaun atu fó apoiu ba eskola ne’ebé hetan estragus.

Primeiru Ministru, Taur Matan Ruak, husu atu SEPS no liña ministeriál sira kontinua servisu hamutuk hodi ajuda povu sira ne’ebé sofre durante inundasaun.

Jornalista : Eugénio Pereira

Editór       : Francisco Simões  

HAKEREK NO HATÁN

Please enter your comment!
Please enter your name here