Membru Deputadu Parlamentu Nasional Perodu 2018-2023 wainhira halao votasaun ba presidenti Parlamentu iha edifisiu Parlamentu Nasional 13 de Juinu 2018.FOTO TATOLI

DILI, 24 fevereiru 2020 (TATOLI)—Parlamentu Nasionál (PN), aprova votu pezár ba saudozu Komandante Unidade Polísia Marítima (UMP), Lino Saldanha, ne’ebé husik hela família no oan-kiak sira iha fulan-ida ne’e.

Proponente ne’ebé propoin votu pezár ne’e mak hanesan Deputadu Jose Agustinho Somoxo, David “Mandati” Dias Ximenes, Abel Pires da Silva no Deputada Veneranda Lemos.

Prezidente Parlamentu Nasionál Ein Ezersísiu atuál Segundu Vise-Prezidente Parlamentu Nasionál, Deputadu Luis Roberto hateten, saudozu Lino Saldanha merese hetan rekoñesimentu hosi uma fukun.

Meza Parlamentu Nasionál ne’ebé dirize Deputadu Luis Roberto ho votu a-favór 46 kontra 0 no abstensaun 0.

Deputadu Bankada FRETILIN, José Agustinho Somoxo hateten, Komandante Lino Saldanha merese hetan rekoñesimentu.

“Votu de pezar ha’u hanoin kompletu ona, komndante Lino Saldanha, preferénsia sira ne’ebé ita foti natoon ona hodi rekoñese saudozu nia luta ba prosesu luta ne’e.” dehan Xomoxo liuhosi plenária Parlamentu Nasionál, segunda ne’e.

Purtantu Deputadu Bankada Parlamentár FRETILIN, David Dias Ximens ‘Mandati’ no Deputada Maria Angélica Rangel, propoin tau mós saudozu nia oan sira iha dokumentu votu pezár ne’e, nune’e ba futuru oan sira bele buka dokumentu karik fásil.

Deputadu FRETILIN Marito Mota, sente triste tanba lakon kolega ne’ebé iha prosesu luta terus hamutuk molok hetan Timor-Leste independénsia.

“Hakarak mós hato’o ami-nia omenájen ikus ba saudozu Lino Saldanha, hanesan mós ba organizasaun Fitun. Iha tempu situasaun defísil iha 1990, ami halo juramentu hemu-raan hamutuk iha Pai Nosso Santa Cruz, ami na’in-41 mak halo juramentu inklui saudozu Lino katak luta ne’e tenke bá-oin. Durante rezisténsia saudozu mós envolve iha manifestante hotu-hotu,” Deputadu Marito Mota haktuir.

Deputadu Bankada Parlamentár PLP, Cornélio “L7” Gama rekoñese kontribuisaun saudozu Lino Saldanha iha tempu rezisténsia tanba nia sakrifísiu la selu hotu to’o nia mate de’it.

“Tanba ne’e ha’u vota a-favor,” dehan Cornelio “L7” Gama.

Entretantu, Deputadu Bankada CNRT, Gabriel Soares hateten, saudozu Lino Saldanha merese hetan rekoñesimentu hosi Parlamentu Nasionál.

“Ha’u apresia tebes ba votu de pezár maibé votu de pezár ne’e tenke iha valorizasaun,” dehan Deputadu CNRT ne’e.

Notísia Relevante: Deputadu Sira Propoin, PN Fó Votu Pezár Ba Komandante Lino Saldanha

Jornalista  : Evaristo Soares Martins

Editór        : Cancio Ximenes

HAKEREK NO HATÁN

Please enter your comment!
Please enter your name here