Doutora Obstretrícia no Gineconolojia, Amita Thampa.Imajen Espesial.

DILI, 24 fevereiru 2020 (TATOLI)—Parlamentu Nasionál (PN), ohin, aprova votu pezár ba Doutora Amitha Thampa, ne’ebé fila-hikas ona iha 16 fevereiru 2020 foin lalais ne’e.

Reprezentante povu sira iha Parlamentu Nasionál, segunda ne’e aprova votu pezár ba matebian Doutora Amitha ho votu a-favór 46, kontra 0 no abstensaun 0.

Deputadu Bankada Parlamentár FRETILIN, Francisco Miranda Branco, konsidera sentimentu Doutora Amitha nian boot tebes, tanba maske moras todan hela maibé Doutora kontinua fó tratamentu ba pasiente balun tanba sentimentu umanu.

Ho sentimentu umanu ne’ebé Doutora Amitha iha, Branco dehan, sosiedade Timorense presiza banati tuir tanba iha valór ne’ebé aas tebes.

“Ema ne’ebé mai serbisu iha tempu UNTAET maibé nia fuan no laran hadomi povu Timor-Leste tanba nia hadomi, nia hela iha ita-nia rain. Ema barak la hetan oan maibé nia konsege halo inan sira-ne’ebé kondenadu la hetan oan, maibé halo inan ne’ebé bele hahoris oan. Ho votu pezár ne’e onra, Gloria ba Doutora Mita ne’ebé ami sei temi nafatin ita-nia naran iha ami-nia memória,” Deputadu Branco, koa’lia liuhosi plenária Parlamentu Nasionál, segunda ne’e.

Purtantu Deputada Bankada Parlamentár CNRT, Veneranda Lemos, espera sentida kondolénsia ba Doutora Amitha hanesan Timor-oan tanba kontribuisaun ne’ebé Doutora Amitha halo boot tebes liuliu dezenvolve saúde reprodutiva.

Deputada CNRT ne’e konsidera dedikasaun profisionál no domin ba nia profisaun ho ninia kompromisu boot tebes iha área saúde nian.

Doutora Amitha hela iha Timor-Leste tinan 17 ona no mós tuir teste hakarak hetan nasionalidade Timorense maibé ninia nasionalidade sei iha prosesu.

“Ita feto Timor, inan no bebé sira deve Doutora ne’e no ita selu labele. Doutora ne’e ninia profisionalizmu ba ita hanesan rekordasaun. Doutora ne’e mós sai inspiradora ba profisionál saúde sira. Liuhosi orasaun ha’u hato’o Nai Maromak bele haraik hakmatek ba Doutora Amita no fó korajen ba oan sira ne’ebé oras ne’e mai hela iha Timor,” nia hateten.

Tuir nia, hanesan feto Timor-oan hato’o agraesimentu ba buat di’ak hotu ne’ebé Doutora Amitha kontribui iha saúde reprodutiva nian.

Proposta ne’e mai hosi Deputadu FRETILIN, Francisco Miranda Branco, Deputada PLP, Maria Angelina Sarmento, Deputadu PLP, Abel Pires da Silva no Deputada CNRT, Veneranda Lemos.

Doutora Amitha Thampa moris iha Katmandu, sidade Nepal, iha 23 agostu 1956 no mate ho idade 63.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here