Diretór Jerál Água no Saneamentu, Gustavo da Crus, foto hamutuk ho ekipa Empreza Empreza Luliana, Unipesoál.Lda. Imajen/Florencio Miranda Ximenes

DILI, 24 fevereiru 2020 (TATOLI) – Ministériu Obra Públika (MOP) liuhosi Diresaun Jerál Água no Saneamentu (DGAS-sigla portugés), asina kontratu ho Empreza Luliana, Unipesoál.Lda, atu hamoos drainajen sira iha kapitál Dili, nune’e bele prevene indundasaun no moras afetadu sira husi lixu.

Diretór Jerál Água no  Saneamentu, Gustavo da Crus, hateten MOP liuhosi DGAS iha obrigasaun atu garante drainajen sira iha kapitál Dili moos hodi hamenus inundasaun no risku ba moras sira ba komunidade.

“Ohin, ofisialmente ha’u lansa ho ekipa husi kompañia Luliana, Unipesoál.Lda, ho nia membru hamutuk na’in-100, ne’ebé hetan fiar husi MOP hodi hamoos drainajen sira iha kapitál Dili laran, hahú husi fulan ne’e to’o agostu”, informa Dirijente ne’e, hafoin entrega knaar ba empreza iha edifísiu DGAS, Caicoli, segunda ne’e.

Nia observa, hahú iha janeiru to’o agora, bainhira udan tuun, hamosu inundasaun iha kapitál nasaun tanba sedimentasaun no lixu nakonu iha drainajen sira.

Ho nune’e, Gustavo da Cruz hateten nia parte fiar empereza Lulina bele hamenus inundasaun no risku ba moras.

“Ita akompaña moras sira hanesan Dengue mós aumenta, ne’ebé ita espera ho atividade limpeza jerál ne’e bele minimiza susuk ne’ebé tolun iha baleta sira”, nia akresenta.

Nune’e, Diretór Jerál ne’e husu mós ba autoridade lokál sira, liuliu Prezidente Autoridade no Xefe Suku sira bele organiza komunidade hodi fó apoia ba ekipa limpeza husi empreza ne’e.

“Ekipa ne’e agora konsentra iha área Aimutin no Fatuhada, ami husu atu komunidade mós labele so’e foer arbiru hodi fasilita hamoos drainajen ho di’ak”, nia realsa.

MOP mós entrega ekipamentu manuál no apoia mós ekipamentu pezadu atu bele hamoos sedimentasaun ne’ebé nokonu iha ezgotu sira iha kapitál Dili.

Parte seluk, Jerente Kompañia Luliana, Unipesoál. Lda, Nazario Gonçalves, hateten nIa parte ho ekipa sei serbisu ho di’ak atu bele hamoos drainajen.

“Ami simu fiar atu hamoos drainajen sira iha Dili laran tomak, liuliu hasa’e sedimentasaun atu bee dalan sira moos hodi redús inundasaun”, nia informa.

Nune’e, Jerente kompañia Luliana komprometidu sei esforsu atu limpeza ba drainajen sira, bazeia ba kontratu ne’ebé sei hahú husi Becora to’o Tasi-Tolu.

“Ami mós husu ba komunidade iha kapitál Dili atu apoia no kontribui. Bainhira ita hamoos ona labele so’e fali lixu ba ezgotu laran hodi ita hotu kontribui ba sidade Dili moos no livre husi inundasaun,”Jerente ne’e sujere.

Kompañia Luliana, Unipesoál.lda sai manan na’in ba konkursu públiku ne’ebé MOP liuhusi DGAS, ho duransaun fulan-neen, hahú husi fevereiru to’o agostu 2020, ho kustu orsamentu $126.000

Jornalista: Florencio Miranda Ximenes

Editora: Julia Chatarina

1 KOMENTÁRIU

  1. Komentariu deit katak MOP nia idea hodi kontratu kompania hodi hamos drainajen ne’e la dun diak.
    la dun diak ne’e tamba saida? tamba
    1. halo komunidade ou populasaun barukteen,
    2. Funsaun Xefi Aldeia menus,
    3. Funsaun Xefi Suku menus,
    # Kria LEI ida hodi regula ema soe foer aribiru, (mak foin kontratu kompania para kontrola populasaun ou komunidade ne’ebe soe foer arbiru, karik komunidade seidauk iha konsiensia mak aplika MULTA, pois neneik populasaun toman).
    # Kria lei ida hodi regula komunidade ou populasaun geral tenke limpeja bairo laran iha kada Sabadu, (ne’e responsavel Xefi Aldeia no Xefi Suku nian. Xefi suku no Xefi Aldeia laos atu ba tur para hodi asina deit karta, maibe organiza mos komunidade ne’ebe nia lidera ba hodi halo buat diak ruma ba nia BAIRO). tamba koalia konaba dezenvolvimentu nasaun ne’e husi, komunidade ou povu, iha kargu hanesan Xefi Aldeia, Xefi Suku, Administrador to nivel altu. Obrigadu barak (Abraco)

HAKEREK NO HATÁN

Please enter your comment!
Please enter your name here