MJ Entrega Rai Landmark ba Na’in

DILI, 24 fevereiru 24 2020 (TATOLI) – Ministru Justisa (MJ), Manuel Cárceres da Costa, foin lalais ne’e, hasai ona notifikasaun Ministériu Justisa nian hodi entrega rai Landmark Plaza ba nia na’in (ema privadu).

Informasaun ne’ebé espalla katak, iha tempu indonézia, rai ne’e sosa husi sidadaun Indonézia ida ne’ebé hola feto Timoroan. Nune’e, molok referendum 30 Agusto 1999, família ne’e refuijia tiha ba Indonézia.

Iha tinan 2007 iha mandatu IV Governu Konstitusionál liuhosi Ministra Justisa, Lucia Lobato, halo kontratu arrendamentu ho kompañia Landmark hodi halo investimentu iha rai refere iha area Fatuhada, Dili.  Nune’e, kompañia Landmark iha devér selu arrendamentu ba estadu fulan-fulan tuir kontratu.

Responde ba informasaun, oinsá mak MJ bele entrega fali rai ne’e ba ema privadu no la’ós ona konsidera hanesan rai Estadu ne’ebé jere hosi Governu,  Sekretáriu Estadu Terras no Propriedade (SETP), Mário Ximenes, klarifika katak, razaun Governu Timor-Leste liuhosi desizaun Ministru Justisa, Manuel Cárceres, entrega hikas rai Landmark ba rai na’in nu’udar desizaun ida ne’ebé legál tuir lei.

Sekretáriu Estadu Mário Ximenes rekoñese katak, dezde Timor-Leste ukun-aan rai Landmark ne’e Estadu maka jere no kualkér empreza ne’ebé halo atividade negósiu iha fatin ne’e selu ba estadu, depois la’o too klaran, rai na’in aprezenta dokumentu rai nian kompletu, nune’e governu deside fó fila ba rai na’in.

“Rai ne’e la’ós sidadaun Indonézia nian, maibé sidadaun ne’e iha mistu kazamentu. Señora rai ne’e nia sidadaun Timor, maibé ninia katuas-oan maka ema sidadaun estranjeiru. Agora ligasaun ho propriedade ne’e tanba sira na’in rua kazamentu, tuir ita nia Rejimentu Kódigu Sivíl ita opta Sistema Komuniaun Jerál. Signifika, saida maka feto ninian direitu hetan sira na’in rua iha direitu hanesan hotu,” esplika Sekretáriu Estadu Terras no Propriedade, Mário Ximenes, hodi responde Ajénsia Tatoli, ohin, iha Palásiu Governu.

Nia esklarese tan hodi dehan, “agora señór Ministru Justisa foti desizaun fó fali ba rai na’in la’ós sala, lae! Ne’e merese duni tuir lei no tuir kompeténsia ne’ebé maka fó kbiit mai ami no bele deside duni katak, nia (na’in ba rai) maka merese hetan no tuir lei númeru 1/2010 artigu 15 hatete katak, se karik rai ne’e abandonadu hela, estadu maka iha direitu administra provizóriu, la’ós estadu maka na’in, too ikus se na’in mak reklama ho dokumentu komprovativu mai hatudu katak, rai ne’e na’in ninian duni ho dokumentu komprovativu ho testemuña ho justifika katak rai ne’e ninian duni, maka ita iha devér entrega fali ba nia na’in,”.

Ministru Cárceres Halo Klarifikasaun

Ministru Justisa (MJ), Manuel Cárceres da Costa, mós halo klarifikasaun hodi responde Ajénsia Tatoli, iha Palásiu Governu, sesta (21/02/2020), katak, nia parte notifikadu ona rai Landmark Plaza hanesan rai privadu tanba konsidera rai ne’e sidadaun timoroan ida nian.

Ministru Manuel Cárceres, lia tun dehan, rai ne’e privadu duni, ida uluk halo kontratu arrendamentu ne’e mak “la dun atensaun” no agora kazu ne’e hotu ona.

Ministru Cárceres afirma, tuir dokumentu ne’ebé iha komprova rekoñese ema ne’e moris iha Timor, ka’er pasaporte RDTL, kartaun eleitorál no billete identidade Timor.

“Ita fó sidadania ba ema ne’e, nia iha direitu ka la’e,” hateten Ministru Cárceres hodi mensiona mós katak, se ema ruma la satisfás, maka nia parte prontu hatán tanba buat hotu ministru halo loos hela.

Ajénsia Tatoli ba to’o ona iha Landmark Plaza atu hetán klarifikasaun hosi na’in ba kompañia Landmark Plaza hodi buka hatene kona-ba durante ne’e sei selu arrendamentu ba estadu ka selu ona ba na’in privadu ne’ebé MJ notifika hanesan na’in ba rai Landmark Plaza, maibé na’in ba kompañia Landmark Plaza halo hela vizita ba rai li’ur.

Jornalista : Eugénio Pereira/Nelson de Sousa

Editór       : Francisco Simões