Joven balun uza atributu arte marsiál hodi halo ona movimentu iha Vila Antiga, Baucau ne'ebé halo video hodi espalla iha rede sosiál Facebook. Imajen/screen shoot hosi video ne'ebé espalla iha Facebook

DILI, 24 fevereiru 2020 (TATOLI) – Komandante Jerál Polisia Nasionál Timor-Leste (PNTL), Komisáriu Faustino da Costa, lamenta ho atitude membru  Grupu Organizasaun Arte Marsiál (GAM) balun nian ne’ebé halo movimentu ho atributu  iha Vila Antiga, Munisipiu Baucau.

Notísia Relevante : Xefe Estadu Husu GAM La’o Tuir Lei

membru aste marsiál balun halo movimentu iha Vila Antiga, Baucau. Imajen/screen shoot hosi video ne’ebé espalla iha Facebook

Liuhosi video ho durasaun minutu balun ne’ebé espalla iha rede sosiál Facebook  hatudu joven balun  kondús motor Vixon no na’in rua seluk uza motor Mio Beat koor mutin hatais farda arte marsiál balun halo movimentu iha sidade Vila Antiga, Baucau, liuhosi Igreja Katedrál nia oin hodi orienta ba malu  aselera motor (gas motor).

“Iha akontesimentu no movimentu balun iha Baucau  kuandu governu hasai ona rezolusaun kona-ba arte marsiál. Arte Marsiál balun komesa hatais farda hatudu-aan la’o ba mai, ne’ebé ha’u aprezenta ba señór Primeiru Ministru katak, ami PNTL tau hela atensaun,” informa Komisáriu Faustino da Costa, ba jornalista hafoin aprezenta relatóriu situasaun seguransa territóriu Timor-Leste ba Primeiru Ministru, Taur Matan Rauk, ohin, iha Palásiu Governu, Dili.

Notísia Relevante : F-FDTL ho PNTL Kumpre Desizaun Governu Reativa GAM

Nia dehan, bainhira halo movimentu ba mai iha vila bele provoka problema ruma ne’ebé ema la espera. Tanba ne’e, Komisáriu Faustino da Costa, apela ba lideransa Persaudaraan Setia Hati Terate (PSHT), Ikatan Kera Sakti (IKS) no Kmanek Oan Timor Rai Klaran (KORK) tenke koopera ho autoridade seguransa no ba rejista sira nia organizasaun iha Governu hodi konsidera nu’udar organizasaun arte desportu ida iha Timor-Leste.

“Organizasaun arte marsiál sira tenke kumpre rekizitu sira hodi ba rejista-aan ona para hatudu ninia estrutura no fatin treinamentu ida klaru,” Faustino da Costa afirma.

Nia dehan, bainhira organizasaun sira ne’e la koopera, parte PNTL no F-FDTL sei ezekuta lei númeru 5/2017 hodi kontrola organizasaun sira ne’e.

Jornalista : Eugénio Pereira

Editór        : Francisco Simões

3 KOMENTÁRIU

  1. Hahahaha. La kle’ur tan Timor rame fali ona ho konflitu entre GAM. Grupu sira-ne’e ninia objetivune’e buka masa. Bainhira iha masa barak ona sira bele transforma an fali ba partidu politiku. Aban bainrua, partidu ho ideolojia arte marial nian maka sei ukun fali nasaun ne’e. Kampanha eleitoral sira sei la vale buat ida tanba eleitor sira ne’ebe envolve an grupu sira-ne’e sei la haree ba programa politika partidu nian maibe sei haree liu ba ninia pertensa ba grupu sira ne’e. Maun boot sira be oras ne’e ukun rai ne’e balu sei bele akompanha ida-ne’e. Ne’e ha’u-nia previzaun de’it

  2. Tuir hau nia previzaun ita nia nasaun sei barulho fila fali ho konflitu entre GAM tamba laiha lei ida que forte hodi regula actividades GAM sira nian. Percisa nain ulun nasaun sira nian hanoin no tetu didiak hodi kria lei ida que mais forte atu nune bele regula actividades GAM sira nian, se lae mak mais tarde GAM sira sei kria konflitos entre sira (Ataka no Oho malu) hodi perturba actividades ema seluk nebe hakarak moris hakmatek hodi goja independencia ne.

HAKEREK NO HATÁN

Please enter your comment!
Please enter your name here