Luis Roberto, Deputadu Bankada KHUNTO

DILI, 24 fevereiru 2020 (TATOLI)—Partidu Kmanek Haburas Unidade Nasionál Timor Oan (KHUNTO), husu partidu Congresso Nacional de Reconstrução de Timor (CNRT) atu tetu didi’ak membru indijitadu na’in-hitu ne’ebé antes ne’e Prezidente Repúblika, Francisco “Lú OLo” Guterres rejeita fó pose.

“Ba ema na’in-rua hosi KHUNTO durante ne’e pendente, ami iha partidu laran tetu mós ema na’in-rua. Kuandu dehan troka, ami troka kedas. Filafali ba na’in-hitu ne’e mós ami husu ba iha partidu CNRT tetu mós ba lista ne’ebé pendente. Karik iha buat ruma ne’ebé laloos relasaun ho justisa, ha’u fiar katak partidu CNRT ne’e ema mesak matenek. Sira hatene di’ak kona-ba lala’ok justisa iha Timor katak ita hotu-hotu iha lei nia okos,”  Adjuntu Sekretáriu Jerál Partidu KHUNTO, Luís Roberto, informa ba jornalista sira, iha resintu Parlamentu Nasionál, segunda ne’e.

Maibé, Luís Roberto fiar katak, Prezidente Partidu CNRT, Kay Rala Xanana Gusmão mak lidera koligasaun ne’e sei tetu desizaun ne’ebé di’ak ba ema sira ne’ebé Prezidente Repúblika rejeita fó pose ne’e.

Nia dehan, fukun hosi problema sira-ne’e hotu tanba ema na’in-sia ne’ebé la hetan pose ne’e, entaun Xanana Gusmão ne’ebé lidera koligasaun foun hatene problema sira-ne’e hotu.

“Ba ami (KHUNTO) sempre iha mudansa. Kuandu públiku dehan ida-ne’e problema ho justisa ami bele troka kedas. KHUNTO sempre banati tuir Konstituisaun RDTL. Saida mak Prezidente Repúblika ko’alia ami apoia no kumpre desizaun saida de’it,” nia haklaken.

Adjuntu Sekretáriu Jerál KHUNTO ne’e fiar katak Prezidente Repúblika, Francisco “‘Lú Olo’” Guterres sei foti desizaun ne’ebé justu hodi hakotu impase polítika ne’ebé la’o kle’ur ona.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here