Segundu Vise-Prezidente Parlamentu Nasional, Luis Roberto, Deputadu Bankada KHUNTO

DILI, 24 fevereiru 2020 (TATOLI)—Adjuntu Sekretáriu Jerál Partidu Kmanek Haburas Unidade Nasionál Timor Oan (KHUNTO), Luis Roberto hateten, KHUNTO hakarak Kay Rala Xanana Gusmão mak lidera IX Governu.

“Se ema seluk hosi ne’e, ita sei ko’alia. Atu garante estabilidade governativa ne’e mak ami hakarak señor Xanana mak Primeiru-Ministru. Ami (KHUNTO) deside klaru ona ho fuan no laran. Ami deside ona ho koletiva tebes intermu partidu KHUNTO nian. Ami deside maka señor Xanana Gusmão tenke ba Primeiru-Ministru, laiha ema seluk mak okupa kargu ne’e,” Adjuntu Sekretáriu Jerál Partidu KHUNTO, Luis Roberto, informa ba jornalista sira iha resintu Paralamentu Nasionál, ohin.

Nia hatutan, KHUNTO nia hanoin no vizaun maka atu kria IX Governu hakarak Xanana Gusmão mak sai hanesan Xefe Governu.

Nia dehan, ida-ne’e desizaun koletivu partidu KHUNTO nian, tanba ne’e mak KHUNTO mós hakarak hola parte iha koligasaun foun ne’e.

Maske nune’e, nia dehan, estrutura ba konjuntura polítika foun ne’e nia seidauk bele fó-sai tanba asuntu ne’e sei sedu liu.

Maibé, nia hateten, partidu neen (6) ne’ebé hamutuk forma koligasaun foun atu responde ba desizaun Prezidente Repúblika, Francisco  “Lú Olo” Guterres, kona-ba movimentu polítiku.

Notísia Relevante: PR Lú Olo: “CNRT Hanoin Didi’ak Bainhira Hakarak Aprezenta Hikas Lista Ema Na’in-Sia”

Jornalista : Evaristo Soares Martins

Editór      : Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here