Ekipa Task Force hosi Diresaun Jerál Água no Saneamentu (DGAS) liuhosi Diresaun Nasionál Servisu Água (DNSA) hadi’a hikas ona liña transmisaun kanu bee-moos nian iha Benamauk, iha loron 02 agostu 2019. Nune’e, komunidade iha área Becora nian bele asesu hikas ona bee-moos hosi estasaun tratamentu Bee-moos Benamauk. Imajen/DNSA

DILI, 24 fevereiru 2020 (TATOLI)–Xefe Departamentu Abastesimentu Água Munisípiu Dili, Francisco Pereira Xavier hateten, rezervatóriu Benamauk Becora nian labele fornese bee ba komunidade sira iha parte Bedois, Terminál Becora nian tanba kanu nia roska mak ema deskoñesidu dulas aat tiha.

“Bee iha rezervatóriu Benamauk Becora nian la fornese ona bee-moos ba komunidade sira iha Bedois no Terminál Becora durante semana tolu ona tanba ita-nia komunidade balu mak dulas aat tiha kanu nia roska hodi bee labele sai,” dehan Francisco Pereira Xavier ba Ajénsia TATOLI iha nia knaar fatin, Caicoli, Dili, ohin.

Tuir nia, ekipa abastesimentu halo ona operesaun no koko loke rezervatóriu maibé ladi’ak nafatin.

“Roska rezervatóriu mak loke taka ladi’ak entaun ita presiza sobu para hadi’a,” nia informa ba TATOLI.

Nia hatutan, aleinde komunidade sira parte Bedois no Terminál maibé komunidade ne’ebé liga kanu ba diresaun Benamauk nia mós labele asesu bee moos to’o agora.

“Roska kanu rezervatóriu ne’e buka ona maibé seidauk hetan. Nune’e, Direasaun Nasionál Servisu Agua (DNSA) labele sobu bainhira nia sasan seidauk iha,” nia dehan.

Notísia Relevante: DNSA Kontinua Halo Manutensaun ba Kanalizasaun Bee Moos

Jornalista : Osória Marques

Editór       : Cancio Ximenes 

HAKEREK NO HATÁN

Please enter your comment!
Please enter your name here